Astana ortalyǵynda erekshe bilim berý qajettilikteri bar balalarǵa keshendi kómek kórsetiledi
ASTANA. KAZINFORM – Astana qalasyndaǵy «№5 psıhologııalyq-pedagogıkalyq túzetý kabınetinde» «Aýtızm máseleleri jáne balalardyń psıhologııalyq densaýlyǵyn saqtaý» taqyrybynda ashyq esik kúni uıymdastyryldy, dep habarlaıdy elorda ákimdiginiń resmı saıty.
Іs-shara barysynda ata-analarǵa balalardyń psıhologııalyq erekshelikteri týraly keńinen aqparat berilip, olarmen tıimdi qarym-qatynas ornatý, durys qoldaý kórsetý ádisteri túsindirildi. Mamandar ár balanyń jeke damýy men minez-qulqyna saı jumys júrgizýdiń mańyzdylyǵyna toqtaldy.
Ashylǵanyna bir jyl tolǵan mekemeniń jobalyq qýattylyǵy jylyna 150-200 balany qamtýǵa eseptelgen. Jalpy aýdany 625 sharshy metrdi quraıtyn ortalyqta zamanaýı ádistemelik jáne dıdaktıkalyq materıaldarmen jabdyqtalǵan 10 arnaıy kabınet jumys isteıdi. Bul kabınetter balalardyń jan-jaqty damýyna jaǵdaı jasaýǵa baǵyttalǵan.
Ortalyqta túrli baǵyttaǵy bilikti mamandar qyzmet etedi. Atap aıtqanda, muǵalim-logopedter, defektologtar, pedagog-psıhologtar, beıimdelgen dene shynyqtyrý nusqaýshylary, mýzyka jetekshisi, sýrdopedagog, tıflopedagog jáne erte qoldaý tobynyń tárbıeshileri balalarǵa keshendi kómek kórsetedi. Barlyq mamandar arnaıy oqý ortalyqtarynan ótip, kásibı biliktiligin arttyrǵan.
– Túzetý kabınetterinde ártúrli baǵyttaǵy mamandar jumys isteıdi. Ortalyq eýrostandarttarǵa saı jabdyqtalǵan. Árbir maman balanyń jeke psıhologııalyq erekshelikterine qaraı qyzmet kórsetedi. Mysaly, turmystyq baǵdarlaý kabınetinde balalarǵa kúndelikti ómir daǵdylary úıretiledi. Olar tamaq daıyndaýdy, kir jýýdy, turmystyq tehnıkalardy qoldanýdy meńgeredi. Sonymen qatar mekeme sensorlyq ıntegratsııa baǵdarlamalaryn júzege asyrý úshin qajetti barlyq qural-jabdyqtarmen tolyq qamtamasyz etilgen. Búgingi tańda ortalyǵymyzda alǵashqy jumys tsıkli sátti aıaqtalyp, onyń aıasynda shamamen 141 bala túzetý baǵdarlamasynan ótti. Qazirgi ýaqytta erekshe bilim berý qajettilikteri bar balalarǵa komandalyq baǵalaý júrgizilip, árqaısysyna jeke damý baǵyty aıqyndalýda, - deıdi ortalyq basshysy, logoped maman Gújanar Ahaeva.
Buǵan deıin Astanada erekshe balalar arnaıy mamandary joq jalpy synypta bilim alǵanyn jazǵan edik.
