Astana ormanynda jemis-jıdek terý naýqany bastaldy
ASTANA. QazAqparat - Elorda irgesindegi ormandarda qaraqat terý naýqany bastaldy. Búginde qalaǵa kire beris joldarda jemis-jıdek saýdasy jandana qyza tústi, dep habarlaıdy Astana ákimdiginiń medıa ortalyǵy .
«Sońǵy ýaqyttarda aýa-raıynyń qubylmaly, shaýyn-shashyn bolýyna baılanysty qaraqat terýshiler azaıǵan. Biraq kún saıyn eń az degende kemi on shaqty adam kelip terip ketedi», - dedi «Astana ormany» JShS-nyń bas agronomy Ardaq Hasenov.
Onyń aıtýynsha, sońǵy jyldary jaz kezindegi jıdek naýqanynda kelýshiler qatary artyp keledi.
«Senbi, jeksenbi kúnderi qaraqat terýge keletinder kóbeıedi. Sondaı-aq maýsym sońyna deıin kún saıyn bizdiń ormanǵa kelip, qaraqat terip ony satýmen aınalysatyn adamdar bar. Demalys kúnderi ádette terip-satýshylardyń sany 50-60-qa jetedi. Sonymen birge, astanalyqtardan bólek, qalanyń mańyndaǵy aýyldardan arnaıy kelip terip ketetinder ber», - deıdi agronom.
Ormanshylardyń esepteýinshe, bir gektardan orta eseppen 3 tonna qaraqat jınalady. Joldyń jıegindegi «jıdek bazarynda» qaraqattyń bir sheleginiń (10 lıtr) baǵasy 2 myń teńge. Al qala ishindegi baý-baqsha ónimderin satatyn shaǵyn bazarlarda 2-5 myń teńge aralyǵynda.
