Astana-Oral baǵytyndaǵy ushaq bortynda júkti kelinshektiń tolǵaǵy ustap qaldy

Oral qalalyq kópbeıindi aýrýhanasynyń dáriger-hırýrgy Taýbaı Bekjanulynyń Kazinform tilshisine málim etkenindeı, 18 naýryz kúni Astanadan ushyp shyqqannan soń shamamen bir saǵattan keıin ekiqabat áıeldiń sýy ketip qalǵan.

Onyń sózine qaraǵanda, bul júktiliktiń 27 aptalyǵy, merziminen buryn bosaný áreketi edi. Bortta dáriger kómegi qajet dep habarlady. 

— Sodan Farıda esimdi osteopat dáriger ekeýmiz bardyq. Qaraǵan kezde jatyr moıyny 4 sm ashylǵan eken, bosaný úshin 8 sm-dan joǵary bolýy kerek. Sonymen qatar qan kete bastady (ushaq qonǵansha 400-500 ml-ge deıin qan ketti). Oǵan qosa ishin ustap qaraǵanda, jatyrdyń jıyrylmaı qalǵany belgili boldy. Medıtsınada muny atonııalyq jatyr deıdi. Alǵashqy kómek kórsetip, kapıtanmen sóılesip, keri qoný kerektigin aıttyq. Óıtkeni shaqalaqtyń jaǵdaıy belgisiz boldy. Áıelde týma júrek aqaýy, arterııalyq gıpertonııa aýrýlary boldy. Sondaı jaǵdaıda qonyp, ony jedel járdem dárigerlerine tabystadyq, — dedi Taýbaı Bekjanuly.

Dárigerdiń aıtýynsha, júkti kelinshek Batys Qazaqstan oblysynyń turǵyny, jasy otyzdan asqan, úshinshi sábıine aıaǵy aýyr bolǵan eken. Keıin ol aman-esen bosanyp, uldy boldy.

— Maǵan jedel áreket etip, alǵashqy dárigerlik kómegimdi kórsetkenim úshin Fly Arystan kompanııasy alǵysyn bildirdi, — dedi ol.

Oral halyqaralyq áýejaıynyń baspasóz hatshysy Aınagúl Saqposynovanyń naqtylaýynsha, atalǵan ushaq Oralǵa 18 naýryz kúni saǵat 23.25-te qoný kerek edi. Alaıda saǵat 23.00 shamasynda Astanaǵa keri qaıtty dep habarlaǵan. Keıin Oralǵa keshigip, 19 naýryz kúni saǵat 03.00-de keldi. 

Eske sala keteıik, budan buryn Oraldan Túrkistanǵa reıster qaıta bastalatynyn jazǵan bolatynbyz.