«Astana operasynyń» álemdik týyndysy Almatyda kórsetiledi
ALMATY. QazAqparat - Almatyda klassıkalyq óner merekesi bastaldy. Súndet Baıǵojın, Maıra Muhametqyzy syndy álemdik deńgeıdegi ártisterdi bastap kelgen «Astana Opera» teatry elimizdiń mádenı astanasynda bir apta boıy repertýaryndaǵy eń úzdik qoıylymdaryn usynbaq, dep habarlaıdy QazAqparat tilshisi.
Abaı atyndaǵy qazaq memlekettik akademııalyq opera jáne balet teatrynda astanalyq ártister 10-18 aqpan kúnderi óner kórsetedi. Gastroldik sapar «Abaı» operasymen bastalady. Qoıylym 10-11 aqpan kúnderi ótedi. Búgin Qazaqstan jáne Italııanyń óner qaıratkerleri daıyndaǵan spektakldiń qorytyndy daıyndyǵy jýrnalısterge kórsetildi.
««Abaı» operasynyń mýzykalyq jetekshisi ári dırıjeri - Alan Bóribaev. Qoıýshy rejısseri ıtalııalyq tanymal rejısser - Djankarlo del Monako, rejısserdiń keńesshisi - professor Esmuhan Obaev, bas hormeıstr - Qazaqstannyń eńbek sińirgen qaıratkeri Erjan Dáýitov. Al operanyń kórkemdik bezendirilýin ataqty stsenograf Etsıo Frıdjerıo ázirlese, operanyń kostıýmder boıynsha sýretshisi - «Oskar» syılyǵynyń ıegeri Frankýa Skýarchapıno.
«Abaı» operasynda Basty partııany Súndet Baıǵojın men Janat Shybyqbaev oryndaıdy. Aıdar rólinde - Meıir Baınesh pen Nurlan Bekmuhambetov, Ajar rólin - Maıra Muhamedqyzy men Saltanat Ahmetova oınaıdy. Kókpaı partııasyn barıton Erjan Saıpov alǵash ret oryndaıdy. «Abaı» operasy arqyly bizdiń teatrdyń áleýetin kórýge bolady», - dedi jýrnalıstermen ótken kezdesýde «Astana Opera» MOBT dırektorynyń birinshi orynbasary, QR Eńbek sińirgen qaıratkeri Tóleýbek Álpıev. 
Spektakldiń qoıýshy dırıjeri, Ahmet Jubanovtyń shóberesi, ataqty maestro Alan Bóribaev tarıhı «Abaı» operasyna árkim óz jańalyǵyn engizetinin, bul joly kórermen Súndet Baıǵojınniń sheberligine kýá bolatynyn aıtty.
Abaı obrazy - kıeli. Oǵan jeńil-jelpi qaraı almaısyń. Abaı - bizdiń ultymyzdyń «Meni». Qazaqstan óneriniń pasporty. «Abaı» operasy tusaýy 1944 jyly osy teatrda kesilgen. Sodan beri «Abaı» operasy qanshama ret jańǵyrdy. «Abaıǵa» árkim óz jańalyǵyn engizedi. Bul joly sizder Abaıdyń altyn kitaphanasyn, Abaı álemine jańa zaman tehnologııasy arqyly tereńirek úńilesizder. Bul joly Súndet Baıǵojınniń «Abaıyn» kóresizder. Opera kıno emes kóretin, ony kórip qana qoımaı, tyńdaı da bilý kerek», - dedi Alan Bóribev.
«Abaı» operasynda basty partııany oryndaıtyn, Qazaqstannyń eńbek sińirgen qaıratkeri Súndet Baıǵojın osy sapar úshin Rımge barmaı qalǵanyn aıtty.
«Jalpy, qazaq operasy osy «Abaı» atyndaǵy opera jáne balet teatrynda bastalǵan. Barlyq oryndaýshylar, dırıjerlar, kásibı mamandar, óner qaıratkerleri shyǵarmashylyq ómirin osynda bastady. «Abaı» partııasyn osynda oınaıtynyma qýanyshtymyn. Qazir men Rımde bolýym kerek edi, «Don Jýan» operasyna daıyndalýym qajet edi. Biraq, men «Abaıdy» Almatyda qoıatyn bolǵasyn, saparymdy naýryzǵa shegerdim», - degen Súndet Baıǵojın «Abaı» operasy Alan Bóribaevtyń arqasynda nemis tilinde de sóılegenin aıta ketti.
«2012-2013 jyldary «Abaı» operasyn Germanııada qoıdyq. 2013 Dj. Verdı men R. Vagnerdiń 200 jyldyǵyna oraı qoıylǵan barlyq spektaklder ishinde «Abaı» operasy úzdik qoıylym dep tanyldy», - dedi Alan Bóribaev.
«Astana opera» teatry gastroldik sapary aıasynda «Abaı» operasynan basqa 14 aqpan kúni 20-ǵasyrdyń ataqty horeografy Kennet Makmılannyń «Manon» baletin, 17-18 aqpanda Morıs Jarrdyń mýzykasyna jazylǵan Rolan Petıdiń «Parıj Qudaı anasynyń sobory» balet spektaklin usynbaq.
«Aıta keteıik, bul eki horeografııalyq týyndy Reseıdiń halyq ártisi «Astana opera» balet trýppasynyń kórkemdik jetekshisi Altynaı Asylmuratovanyń arqasynda tetardyń repertýaryna endi. Altynaı Asylmuratova basty Manon partııasyn berneshe ret álemdik sahnalarda bılep, baletmeıster Kennet Makmıllan pen Rolan Petıdiń ózimen jumys istegen», - dedi Tóleýbek Álpıev.
Eske sala keteıik, 2013 jyly jumysyn bastaǵan, búginde álemge tanylǵan «Astana opera» teatry alǵashqy gastroldik saparyn 2014 jyly Almatydan bastaǵan bolatyn. 4 jyldan keıin tarıhı sahnaǵa oralyp, otyrǵan astanalyq teatrdyń qoıylymdaryna barlyq bılet satylyp ketti.
