«Astana Operasynda» qazaq kınosynyń mýzykasy shyrqaldy
ASTANA. KAZINFORM — Elordada ótken kontsertte kıno arqyly halyqqa tanymal bolǵan mýzykalyq shyǵarmalar oryndaldy.
Mádenıet jáne aqparat mınıstrligi men «Ulttyq kınony qoldaý memlekettik ortalyǵynyń» qoldaýymen ótken «Provereno vremenem» atty kontsert qazaq kınosynyń úzdik áýenderine arnaldy. Avtorlyq jobanyń jetekshisi — mýzykant ári dırıjer Alıhan Idrısov. Ol buǵan deıin kópshilikke tanymal «Ekran áýenderi» jobasynyń avtory retinde de belgili.
— Bul ıdeıa meniń stýdent kezimde, shamamen 19-20 jasymda paıda boldy. «Karıb teńiziniń qaraqshylary» fılmin kórip otyrǵanda bári sıýjetke kóńil bólse, men mýzykasyna, orkestrdiń qalaı oınaǵanyna qulaq túrdim. Sol sátte kıno mýzykasyn sahnaǵa shyǵarý oıy keldi, — dedi Alıhan Erlanuly.
Maestro alǵashqy kontsertin osy teatr sahnasynda uıymdastyrǵan. Ol kezde ekrandy da óz qarjysyna jalǵa alyp, baǵdarlamany nebári 10 nómirmen jasaǵan.
Alıhan Idrısovtyń aıtýynsha, jobaǵa degen qyzyǵýshylyq jyl saıyn artyp keledi. Bul jolǵy kontsert baǵdarlamasyna «Qyz Jibek», «Meniń atym Qoja», «Brat ılı brak», «Reketır», «Mahabbat stantsııasy», «Taqııaly perishte» syndy fılmderdiń mýzykasy engen. Barlyq orkestrlik óńdeýlerdi avtordyń ózi jasaǵan.
— Kontsertte orkestrdiń ár aspabyn kórsetýge tyrystym. Sahnada fleıta, saksofon, klarnet, tipti dombyra da jeke oınalady. Mysaly, «Qyz Jibek» fılminde dombyra úni mańyzdy ról atqarady, sol atmosferany dál solaı jetkizýge tyrystym, — dedi ol.
Maestronyń jubaıy Jazıra Nurjaýpova da shyǵarmashylyq joldaǵy serigin qoldap keledi. Onyń aıtýynsha, jastardyń teatrǵa qyzyǵýshylyǵy sońǵy jyldary aıtarlyqtaı artqan.
— Birneshe jyl buryn úlken zalda ótken kontsertte zal lyq toly boldy. Tipti qys mezgilinde dalada adamdar qosymsha oryn surap turdy. Kórermenniń kóbi — jastar. Árkim ekrandaǵy fılmnen óz esteligin taýyp, bireýler kóz jasyn tyıa almady, endi bireýler bılep otyrdy. Sol emotsııa — maestro úshin eń úlken marapat, — dedi ol.
Alıhan Idrısov aldaǵy jyly da mýzyka men kınony toǵystyrǵan jańa jobasyn usynýdy josparlap otyr.
— 2026 jyldyń kókteminde taǵy bir erekshe joba bolady. Bul joly basqa format, basqa oryndaýshylar qatysady. Biraq taqyryp sol — mýzyka men kıno baılanysy, — dedi mýzykant.
Kontsertti Sh. Aımanov atyndaǵy «Qazaqfılm» kınostýdııasy jáne «Astana Opera» teatry birlese uıymdastyrdy.
Aıta keteıik, «Astana Balet» teatry halyqaralyq festıvalde kúmis júldege ıe bolǵanyn habarlaǵan edik.
Kámılá Múlik