«Astana Operanyń» jetekshi solısi Taıyr Ǵataýov dúnıeden ótti
NUR-SULTAN. QazAqparat - «Astana Opera» balet trýppasynyń jetekshi solısi, Qazaqstannyń eńbek sińirgen qaıratkeri Taıyr Ǵataýov 10 maýsym kúni qaıtys boldy. Jaqynda belgili ártis jol apatyna ushyraǵan edi, dep habarlaıdy QazAqparat teatrdyń baspasóz qyzmetine silteme jasap.
Taıyr Ǵataýovtyń esimi qazaqstandyq balet jylnamasyna máńgilikke jazyldy, onyń eńbegi baǵa jetpes: ol elordadaǵy horeografııalyq ónerdiń negizin qalaýshylardyń biri boldy. Onyń gastroldik kestesi aýqymdy edi, solıst Qazaqstannyń mártebesin shetelde asqaqtatyp, Frantsııa, Vengrııa, Italııa jáne basqa elderde óner kórsetken. Kóptegen halyqaralyq baıqaýlardyń laýreaty, Qazaqstannyń eńbek sińirgen qaıratkeri, «Debıýtter dostastyǵy» TMD jastar syılyǵynyń laýreaty – onyń marapattar tizimin uzaq jalǵastyra berýge bolady.
Taıyr Ǵataýov bı ustazynyń otbasynda dúnıege kelgen, ákesi bala kúninen bastap zamanaýı jáne halyq bılerine degen mahabbatty boıyna sińdirip, A.Seleznev atyndaǵy horeografııalyq ýchılışege oqýǵa bergen. 2003 jyly ýchılışeni úzdik támamdaǵan soń Taıyr Kúlásh Baıseıitova atyndaǵy ulttyq opera jáne balet teatrynyń solısi atandy. Sol jerde 10 jyl eńbek etti. Al 2013 jyly «Astana Operanyń» jetekshi solısi boldy. 2007 jyly aty ańyzǵa aınalǵan mılandyq La Skala teatrynda (Italııa) taǵylymdamadan ótti. 2018 jyly Qazaq ulttyq horeografııa akademııasyn tamamdap, «Ónertaný ǵylymdarynyń magıstri» biliktiligin aldy.
Taıyr Ǵataýov jarqyn da umytylmas beıneler galereıasyn jasady. «Astana Opera» ónersúıer qaýymynyń jadynda ol P.Chaıkovskııdiń «Aqqý kólindegi» Zıgfrıd, P.Chaıkovskııdiń «Şelkýnchık» baletindegi hanzada Şelkýnchık, L.Mınkýstyń «Baıaderkasyndaǵy» Solor, L.Mınkýstyń «Don Kıhot» baletindegi Bazıl retinde jáne ózge de kóptegen tamasha partııalarmen qala bermek.
«Onyń asqaq armandary, josparlary kóp edi, átteń, oıda joqta ómiri toqtady. Qosh bol, bizdiń Taıyr» dep eske alady áriptesteri.
«Astana Opera» memlekettik opera jáne balet teatrynyń ujymy Qazaqstannyń eńbek sińirgen qaıratkeri Taıyr Talǵatuly Ǵataýovtyń qaıǵyly qazasyna baılanysty marqumnyń týystary men jaqyndaryna kóńil aıtady.
