«Astana Operanyń» solısteri «Sahnager-2018» ulttyq syılyǵymen marapattaldy
ASTANA. QazAqparat - Dástúr boıynsha Halyqaralyq teatr kúni QR Mádenıet jáne sport mınıstrliginiń qoldaýymen «Sahnager» ulttyq teatr syılyǵynyń laýreattaryn marapattaý rásimi ótti, dep habarlaıdy QazAqparat.
Bıyl saltanatty shara Almaty qalasyndaǵy M.ıÝ. Lermontov atyndaǵy Memlekettik akademııalyq orys drama teatrynda ótti. Qazaqstannyń eńbek sińirgen qaıratkeri, «Qurmet» ordeniniń kavaleri, Qazaqstan Respýblıkasynyń Tuńǵysh Prezıdenti - Elbasy Qorynyń laýreaty Súndet Baıǵojın «Úzdik opera solısi» atalymynda laýreat atansa, Qazaqstannyń eńbek sińirgen qaıratkeri, QR Tuńǵysh Prezıdenti Qorynyń mádenıet pen óner salasyndaǵy laýreaty, «Rım syılyǵy» Halyqaralyq balet ártisteri baıqaýynyń ІІ júlde laýreaty Mádına Basbaeva «Úzdik balet ártisi» ataǵyna ıe boldy.
«Sahnager» syılyǵy teatr salasyndaǵy shyǵarmashylyq jetistikteri úshin tabys etiledi. «Astana Operanyń» jetekshi solısteri Súndet Baıǵojın men Mádına Basbaeva «Qazaqstan teatrlary assotsıatsııasynyń» jas daryndardy qoldaýdaǵy mańyzdylyǵyn atap ótti.
««Sahnager» ulttyq teatr syılyǵynyń arqasynda elimizde teatr dástúrleri nyǵaıýda. Opera, balet, dramalyq ónerdiń memlekettik deńgeıde qoldaý taýyp jatqany qandaı keremet. Prezıdentimiz N.Á.Nazarbaev el damýyndaǵy mádenıet pen ónerdiń alar ornyna erekshe mán berýde. Búginde ulttyq maqtanyshymyz dep nyq senimmen aıta alatyn «Astana Opera» teatry úshin Elbasymyzǵa alǵys bildiremiz», - dep atap ótti Mádına Basbaeva.
Súndet Baıǵojın men Mádına Basbaeva «Astana Opera» teatryndaǵy qoıylymdarda, Qazaqstan men alys-jaqyn sheteldegi mádenı is-sharalarda sátti óner kórsetýde. Ártister Qazaqstan mádenıetiniń órkendeýine orasan zor úles qosýda. Jetekshi solıster asqan kásibılik pen ǵajap ártistik sheberlikterin tanytýda.
Eske salar bolsaq, qazaqstandyq «Sahnager» ulttyq teatr syılyǵyn 2017 jyly Qazaqstan teatrlary assotsıatsııasy «Samuryq-Qazyna» Ulttyq ál-aýqat qory» AQ-nyń qoldaýymen qurǵan bolatyn. Ulttyq syılyq teatr dástúrleriniń saqtalyp, nyǵaıýyna yqpal etedi.
2016 jyly «Qazaqstan teatrlary assotsıatsııasynyń» negizi qalandy. Prezıdenti bolyp Qazaqstannyń Eńbek Eri, KSRO jáne Qazaqstannyń Halyq ártisi, Memlekettik syılyqtyń laýreaty, Reseı Federatsııasy «M.Lomonosov» ordeniniń kavaleri, «OTAN» jáne «Dostyq» ordenderiniń kavaleri Asanáli Áshimov taǵaıyndaldy.
