«Astana Operanyń» solısteri Halyqaralyq balet ártisteriniń baıqaýynda jeńiske jetti

Gran-prı syılyǵyna balettiń jetekshi solısi Baqtııar Adamjan, qurmetti birinshi orynǵa jáne Astana ákimshiliginiń arnaıy syılyǵyna balet solısi Serik Naqyspekov ıe boldy. Ekinshi oryn balettiń jetekshi solısi Erkin Rahmatollaevqa berildi, sonymen qatar ol klassıkalyq murany ózine tán erekshelikpen jetkizgeni úshin Petıpa murasy qorynyń jáne Bratıslavanyń «PETIPA PRIX» Ulttyq teatry arnaıy syılyǵynyń ıegeri atandy, dep habarlaıdy teatrdyń baspasóz qyzmeti.

Basty marapat - Bas júlde tájirıbesi mol ártis Baqtııar Adamjanǵa laıyqty tabys etildi.

Bul jyl ártis úshin jetistikke toly erekshe jyl boldy. Onyń jaqynda ǵana qol jetkizgen tabystary áli kúnge jankúıerler jadynda: Ystambulda ótken (Túrkııa, 2016 jyldyń 8 shildesi) balet ártisteriniń V Halyqaralyq baıqaýynda Gran-prı ıegeri, Seýlde (Koreıa Respýblıkasy, 2016 jyldyń 10 tamyzy) ótken XIII Halyqaralyq bı baıqaýyndaǵy 1 oryn ıegeri, mine, balet ártisteriniń III Halyqaralyq baıqaýynda ol taǵy da absolıýttik chempıon atandy (Astana, 2016 jyldyń 16 qyrkúıegi). Bul jeńister - Baqtııardyń kúndelikti tynbaı eńbek etkeniniń jemisi. Daıyndyq zaly ol úshin ekinshi úıine aınalǵan.

- Biz kóp daıyndyq júrgizdik. Degenmen meniń baǵdarlamam barynsha jetkilikti daıyndyqtan ótti, sebebi men bar kúshimmen jumys isteýge tyrystym. Eń mańyzdysy - sahnaǵa shyǵýǵa baısaldylyqpen, shynaıy kózqaraspen den qoıǵan jón. Sahnaǵa shyǵar aldynda tepe-teńdikte bolý úshin deneni durys qyzdyryp alǵan abzal, sonda ózińdi jaıly sezinesiń. Baıqaýlar, árıne, mańyzdy, biraq teatrdyń repertýarly spektaklderine qatysý - men úshin aldyńǵy orynda. Men bizdi deneni durys ustaý tazalyǵyna den qoıyp daıyndaǵan ustazymyz, Reseıdiń eńbek sińirgen ártisi Konstantın Evgenevıch Zaklınskııge rızashylyǵymdy bildiremin, - dep atap ótti Baqtııar.

Jas, bolashaǵynan úlken úmit kúttiretin solıst Serik Naqyspekov, halyqaralyq baıqaýlar men festıvaldarda birneshe ret júldeli oryndar alyp júr. Talantty bıshi ózin-ózi damytýdaǵy úlken umtylystarymen erekshelenedi. Sonymen, saıystyń ekinshi aınalymynda ol ózi shyǵarǵan «Estelik» atty horeografııalyq jobasyn usyndy, qazylar alqasy oǵan laıyqty baǵa berdi. Nómir óte tamasha oryndaldy, óıtkeni, ártis ony daıyndaýdy áldeqaıda erte - shilde aıynda - bastaǵan edi. Klassıkalyq horeografııany da ártis sátti oryndady. Keıin jeńiske ıe bolǵan kezde, ártis óz qýanyshymen áleýmettik jelilerdegi oqyrmandarmen bólisip, olarǵa qoldaǵandary úshin alǵys sezimin bildirdi.

Balettiń jetekshi solısi Erkin Rahmatollaev ta ózin kórsete bildi, ekinshi orynǵa ıe bolǵan ol, bir mezgilde, klassıkalyq murany úzdik jetkizgeni úshin Petıpa murasy Qorynyń jáne Bratıslavanyń «PETIPA PRIX» Ulttyq teatrynyń arnaıy júldesiniń ıegeri atandy. Bul marapat oǵan 2016-2017 jyldardaǵy maýsymda Bratıslava Ulttyq teatrynyń sahnasynda Marıýs Petıpanyń «Korsar» baletinde basty erler partııasyn oryndaýǵa múmkindik beredi. Jetekshi solıst birinshi aınalymda Petr Chaıkovskııdiń «Aqqý kóli» baletinen Zıgfrıdtiń varıatsııasyn múltiksiz oryndap, qazylar alqasy múshelerine úlken áser qaldyrdy. Zamanaýı horeografııa talaby boıynsha nómirin tamasha oryndaǵan ol, úshinshi aınalymnan da ótti, alaıda, qarsylastary shyn máninde jaqsy básekelestik tanytty. Balet jankúıerleri bıshiniń barlyq qozǵalystary jan-jaqty qaıralǵany, kórermenge bar qımylyn bı tilimen senimdi jetkize bilgeni týraly atap ótti.

Baıqaýdyń tóraıymy Altynaı Asylmuratova er ártister bıyl myqty bolǵanyn, olardyń belesti baǵyndyrǵanyn, nómirlerinde emotsııalyq jaǵyna eleýli nazar aýdarylǵanyn aıtyp ótti.

- Men qazaqstandyq bıshilerdiń nómirlerin buryn da kórgenmin, sondyqtan qazir olardyń kásibı jaǵynan óskenin, baıqaýda ózderin óte tamasha kórsetkenin aıta alamyn. Tehnıkalyq, ártistik, mýzykalyq jaǵynan - barlyǵy joǵary baǵada kórsetildi. Meniń oıymsha, bul - daıyndaǵan ustazdarynyń, balet basshylarynyń úlken jetistigi, - dep atap ótti qytaılyq jetekshi horeograf Sıao Sýhýa.

- Ártisterge arnalǵan baıqaýlar - balet kompanııalarynyń ókilderimen baılanystar qalyptastyrýǵa, ózderin kórsetýge múmkindik beredi. Biz tamasha ártisterdi kórdik, bireýdiń joly ońynan bolsa, bireýge onshalyqty sátti bolmaı jatty. Ónerińdi kórsetý - bul da óner, biz solısterdiń jan-jaqty sheberligine qaraı birtutas baǵa berdik. Men qazaqstandyq solıstermen tanystym, buǵan deıin sizderdiń baletti kórý maǵan buıyrmap edi. Zamanaýı horeografııa unady, ásirese Serik Naqysbekov erekshe áserge bóledi. Men osy jerde sonshama kóptegen talantty adamdar bar ekendigine ózimdi baqytty sezindim, - deıdi horeograf Stefan Jeromskıı.

17 qyrkúıekte alǵashqy eki aınalym jeńimpazdarynyń qatysýymen saltanatty Gala-balet ótti.

Baıqaýdyń 10-17 qyrkúıek aralyǵynda ótkenin esterińizge salamyz. Oǵan alys jáne jaqyn shetelderden kelgen 29 ártis qatysty. Baıqaý «Astana Opera» Memlekettik opera jáne balet teatrynyń negizinde ótti. Uıymdastyrýshy - «Balet jáne ulttyq bıdi damytý jáne qoldaý qory».

Qazylar alqasynyń quramynda «Astana Opera» baletiniń kórkemdik jetekshisi, Reseıdiń halyq ártisi Altynaı Asylmuratovanyń tóraıymdylyǵymen ár elden kelgen álemge áıgili tulǵalar jumys istedi: Venger ulttyq baletiniń dırektory, tamasha bıshi ári horeograf Tamas Zolımozı; qytaılyq jetekshi horeograf, Beıjiń bı akademııasynyń professory jáne Qytaı ulttyq bı assotsıatsııasyndaǵy balet komıtetiniń vıtse-prezıdenti Sıao Sýhýa; ıtalıandyq qoıýshy baletmeıster Lýıdjı Bonıno jáne taǵy basqalar.