«Astana Operanyń» solısi Máskeýdegi Kreml saraıynyń kórermenin tánti etti
ASTANA. QazAqparat - 24 naýryzda Máskeýdegi Memlekettik Kreml Saraıynda qazaqstandyq ártis, halyqaralyq baıqaýlardyń kóptegen gran-prı ıegeri, «Astana Operanyń» jetekshi solısi Baqtııar Adamjan óner kórsetti, dep habarlaıdy QazAqparat.
«Astana Opera» teatrynyń baspasóz qyzmetiniń málimetinshe, Baqtııar Adamjan reseılik tanymal baletmeıster Rýdolf Nýreevtiń 80 jyldyǵyna oraı ótkizilgen «Rýdolf Nýreev. Ótkennen bolashaqqa» atty álemdik balet juldyzdarynyń gala-kontsertinde sahnaǵa shyqty.
Osy keshte B.Adamjan «Esmeralda» baletinen (Ts.Pýnı mýzykasy, A.Vaganovanyń horeografııasy) «Dıana men Akteon» pa-de-desi men «Parıj Qudaı anasynyń sobory» baletinen (M.Jarr mýzykasy, R.Petıdiń horeografııasy) «Kvazımodo men Esmeralda» adajıosyn oryndady. Onyń sahnadaǵy áriptesi Qazaqstannyń eńbek sińirgen qaıratkeri, «Astana Operanyń» jetekshi solısi Mádına Basbaeva boldy. Máskeýlik kórermen qazaqstandyq jupty shattyqpen qarsy alyp, ár nómirinen keıin ystyq yqylasqa bóledi.
Eske salar bolsaq, osy rólderdi bir kezderi Rýdolf Nýreev asqan sheberlikpen oryndaǵan edi. Ol HH ǵasyrdyń eń jarqyn bıshisi boldy. Dál Nýreevtiń ózi erler bıi salasynda naǵyz revolıýtsııa jasaǵan bolatyn. Ol kózi tirisinde klassıkalyq balette de, sonymen qatar zamanaýı horeografııada da birdeı qalypta qala otyryp, aty ańyzǵa aınalǵan tulǵa boldy.
«Osynaý tamasha kontserttik baǵdarlamaǵa áriptesterim - álemdik sahnadaǵy aıtýly ártistermen birge qatysyp, óner kórsetý men úshin úlken qurmet. Árıne, sózsiz, bul osyndaı mártebeli jobadaǵy kezdesý qýanyshy, tájirıbemen almasý jáne «Astana Opera» teatry men elimizdi tanytý», - dep atap ótti Baqtııar Adamjan.
Rýdolf Nýreevtiń mereıtoıy qurmetine Memlekettik Kreml Saraıynyń sahnasynda daryndy bıshige alǵys-rızashylyǵyn bildirý úshin álemdik balettiń sańlaqtary bas qosty. Kontsertte búgingi tańdaǵy erler klassıkalyq bıiniń úzdik ókilderi qatysty, olardyń qatarynda: Baqtııar Adamjan (Astana Opera), Ivan Vasılev (Mıhaılovskıı teatry), Semen Chýdın (Reseıdiń Úlken teatry), Vadım Mýntagırov (Kovent-Garden), Denıs Rodkın (Reseıdiń Úlken teatry), Ksander Parısh (Marıın teatr), ıAkopo Tıssı (Reseıdiń Úlken teatry) bar, sonymen qatar olardyń názik jandy keremet áriptesteri de qatysty.
