«Astana Operanyń» hor ujymy Novosibirde óner kórsetedi
ASTANA. QazAqparat - 1 jeltoqsan kúni «Astana Opera» teatrynyń hory Reseıdiń Novosibir akademııalyq opera jáne balet teatrynyń Zak Isıdor atyndaǵy zal sahnasynda keremet kontserttik baǵdarlama usynady, dep habarlaıdy QazAqparat. Novosibir akademııalyq opera jáne balet teatrynyń orkestri men «Astana Opera» horyna elordalyq teatrdyń bas hormeısteri - Qazaqstannyń eńbek sińirgen qaıratkeri Erjan Dáýitov dırıjerlik etedi.
Talǵampaz tyńdarman nazaryna qazaq hor mýzykasynyń jaýharlary, óńdelgen halyq ánderi, sondaı-aq a capella horyna arnalǵan orys hor klassıkasy usynylady.
Sonymen qatar, mazmundy baǵdarlamaǵa «Astana Opera» memlekettik opera jáne balet teatrynyń Kameralyq hory men Novosibir akademııalyq opera jáne balet teatrynyń Kameralyq orkestriniń birlesip oryndaýynda Djakomo Pýchchınıdiń «Messa di Gloria» shyǵarmasy endi.
- Eń aldymen, biz novosibirlik tyńdarman qaýymdy ádemi qazaq hor mýzykasymen tanystyrmaq nıettemiz, bul baǵdarlamanyń erekshe eksklıýzıvine aınalady. Sonymen birge orys hor klassıkasynyń, atap aıtqanda S.Rahmanınov, P.Chaıkovskıı, P.Týrchanınov, ıÝ.Falık jáne t.b. kompozıtorlardyń shyǵarmalaryn usynbaqpyz. Qazaq halyq ánderi taqyrybyna arnalǵan popýrrı - repertýarymyzdaǵy áń áserli nómir, biz ony gastroldik baǵdarlamamyzǵa qostyq. Ekinshi bólimde Dj.Pýchchınıdiń tanymal «Messa di Gloria» týyndysyn oryndaımyz. Jeke partııalarda kóptegen halyqaralyq baıqaýlardyń laýreattary - Meıir Baınesh pen Talǵat Ǵaleev óner kórsetedi, - dedi Erjan Dáýitov.
Gastrolge 40 adamnan quralǵan hor ujymy barady. Eske salar bolsaq, operalyq spektakldegi belsendi qyzmetimen qatar, hor klassıkalyq jáne ulttyq mýzykalyq ónerdi nasıhattaı otyryp, kontsert qyzmetin júrgizedi. Onyń repertýrarynda - álemdik mýzykalyq klassıka jaýharlary, sonymen qatar qazaqstandyq avtorlardyń shyǵarmalary bar. «Astana Opera» hor ánshileriniń daýysy Valerıı Gergıev, Per Lýıdjı Pıtstsı, Ildar Abdrazakov syndy ataqty álemdik maıtalmandardyń joǵary baǵasyna ıe bolǵan.
- Sózsiz, biz tolqyp júrmiz. Óz sheberligimizdi eń joǵary deńgeıde kórsetýge tyrysamyz. Qazirgi tańda belsendi daıyndyq júrip jatyr. Novosibirlik kórermendermen kezdesý sátin asyǵa kútýdemiz, - dep qorytyndylady «Astana Opera» bas hormeısteri, Qazaqstannyń eńbek sińirgen qaıratkeri Erjan Dáýitov.
