Astana Operanyń alǵashqy gastroleri aty ańyzǵa aınalǵan La Scala teatry bolmaq
ASTANA. QazAqparat - Qazaqstannyń mádenı ómirinde eleýli oqıǵa. «Astana Opera» teatryna alǵashqy gastrolerler - La Scala teatry kele jatyr, dep habarlaıdy «Astana Opera» teatrynyń baspasóz qyzmeti.
La Scala teatry ónerpazdarynyń quramynda: Nıkoletta Mannı (Kıtrı / Dýlsıneıa) jáne jas, talantty solıst Karlo Dı Lanno (Bazıl), Djýzeppe Konte (Don Kıhot), Djanlýka Skıavonı (Sancho Pansa), Alessandra Vassalo (kóshe bıshisi), Mık Zenı (Espada), Vırna Toppı (Drıadalar Korolevasy), Serena Sarnataro (Amýr), Federıko Fresı (syǵan), Metıý Endıkott (Lorentso) jáne Rıkardo Massımı (Gamash) bar.
Mılandyq teatr Astana kúnine oraı kórermen nazaryna balettiń jaýharyna aınalǵan Rýdolf Nýrıev óńdegen L. Mınkýstyń «Don Kıhotyn» 30 maýsym, 1, 2, 3, 4 shilde kúnderi usynady.
Máńgilik qoıylymnyń zor aýqymyn tolyqtyra túsetin Rafael del Savıo men Anna Annıdiń jáne kostıýmderdi irikteýge at salysqan Iren Montıdiń ıspan halqynyń naqyshymen ázirlegen dekoratsııalary men kostıýmderi kúni keshe Italııa kórermenin shattyqqa bólese, endi olardy qazaqstandyqtar tamashalaı alady.
Italıandyq teatrdyń bes kúndik gastroli óner súıer qaýym úshin naǵyz merekege aınalǵaly tur. Rýdolf Nýrıev jasaǵan ataqty redaktsııadaǵy kúrdeli bolyp sanalatyn «Don Kıhot» baleti búginde Ispanııa, Meksıka, Japonııa elderinde qoıyldy jáne kúni búginge deıin álemdik teatrlardyń repertýarynda eń kóp oryndalatyny bolyp tabylady. Atalǵan spektaklmen La Scala birneshe ret óziniń teatrlyq maýsymyn da ashqan. «Don Kıhot» baletiniń mereıi ústem bolýynyń qupııasy men ómirsheńdigi, onyń eń talǵampaz degen kórermenniń ózin beı-jaı qaldyrmaıtyn asyp-tasyǵan shabytty bıinde. Spektaklge «Astana Opera» teatrynyń sımfonııalyq orkestri qatysady. Dırıjerlyq tizgin maestro Marchello Spakarotellada bolady.
