«Astana Operadaǵy» merekelik kontsertte N.Nazarbaevtyń súıikti ánderi shyrqalady (FOTO)

ASTANA. QazAqparat - 1 jeltoqsanda «Astana Opera» teatrynyń kameralyq zalynda úzdik mýzykalyq týyndylar oryndalady, olardyń ishinde Nursultan Nazarbaevtyń súıikti ánderi de bar. «Elim dep soqqan júregi» atty merekelik kontsert Tuńǵysh Prezıdent kúnine arnalady.

Keshte qazaq, orys jáne batys eýropalyq kompozıtorlardyń vokaldyq jáne aspaptyq shyǵarmalary oryndalady. Baǵdarlamadaǵy Tuńǵysh Prezıdenttiń súıikti ánderi: «Dýdar-aı», E. Hasanǵalıevtiń «Mereke kúnińmen», «Korobeınıkı» jáne t.b. erekshe oryn alady. Budan basqa tyńdarmanǵa M. Granjanıdiń «Baıyrǵy stıldegi arııasy», G. Dınıkýdiń «Horovody», J. Bızeniń «Karmen» operasynan R. Mendestiń óńdeýindegi áıgili «Habanerasy» usynylady, delingen «Astana-Opera» baspasóz qyzmetiniń habarlamasynda.

Kórermendi kútip tosyn mýzykalyq syılyqtar kútip tur - solıster djaz kompozıtsııalaryn, arfanyń súıemeldeýimen S. Rahmanınovtyń «Aleko» operasynan jas syǵannyń romansyn oryndaıdy, Balalar stýdııasynyń jas ártisteri Á. Ábdinurovtyń «Súıikti meniń Qazaqstanym» qoıylymyn jáne taǵy basqa birneshe nómirler daıyndaýda.

- Biz kórermenimizge naǵyz mereke syılaǵymyz keledi. Kontserttiń taqyrybyn túrlendirip, kúlkili nomerler qostyq, sahnamyzda oryndalmaǵan kompozıtsııalar usynylady. Barlyq solıster ult Kóshbasshysyna óz rızashylyqtaryn bildiredi, ol kisi mádenıetti qoldaıdy, bizdiń spektaklderge, tusaýkeserlerge keledi - bul bıik maqsattarǵa jetýge yntalandyrady. Osy saltanatty kúni Otanymyzǵa degen súıispenshiligimizdi mýzyka tilinde jetkizgimiz keledi, - deıdi aǵa kontsertmeıster Elena Sahno.

Kontsertte óner kórsetetin operanyń belgili solısteri: QR eńbek sińirgen ártisi Jannat Baqtaı, Bashqurtstannyń eńbek sińirgen ártisi Álfııa Kárimova, QR eńbek sińirgen qaıratkerleri Margarıta Dvoretskaıa men Jan Tápın, halyqaralyq konkýrstardyń laýreaty Talǵat Ǵaleev, daryndy aspapshy-mýzykanttar Lıýbov Tkachenko (arfa) , Kırıll Krasıýkov (skrıpka), Aleksandr Malınovskıı (týba), ishekti aspaptar kvartetiniń quramynda: Narǵyz Erejepova, Kırıll Krasıýkov (skrıpkalar), Janar Ahatova (alt), Qurbanjan Ahatov (vıolonchel), sonymen qatar Altynǵanym Ahmetova jetekshilik etetin «Astana Opera» Balalar teatry stýdııasynyń hory.

Fortepıano partııasyn halyqaralyq konkýrstardyń dıplomanty, «Mádenıet qaıratkeri», kontsert avtory Elena Sahno oryndaıdy.

Kontsert 17:00 bastalady, bılet baǵasy - 1 500 teńge.

1991 jyly 1 jeltoqsanda jalpyhalyqtyq saılaýdyń nátıjesinde Nursultan Nazarbaev Qazaqstan Respýblıkasynyń Tuńǵysh Prezıdenti bolyp saılanǵanyn eske sala keteıik. Mereke Qazaqstannyń Tuńǵysh Prezıdentiniń respýblıkaǵa sińirgen zor eńbegin atap ótý jáne tanytý maqsatymen belgilengen.