«Astana Operada» úsh kún qatarynan «Aqqý kóli» baleti qoıylady
ASTANA. QazAqparat - Sáýirdiń 25, 26, 27 kúnderi «Astana Opera» teatrynda ataqty kompozıtor P. I. Chaıkovskııdiń «Aqqý kóli» baleti qoıylady. Bul týraly búgin ótken baspasóz máslıhatynda qazaqstandyq qoıýshy horeograf, «Astana Opera» teatrynyń kórkemdik jetekshisi Tursynbek Nurqalıev aıtty.
«Bul spektakl kostıým sýretshisi men stsenografııa boıynsha sýretshiden basqanyń barlyǵy ózimizdiń qazaqstandyq mamandar bolýymen erekshe. Kostıýmdardyń barlyǵy ózimizdiń teatrda jýyrda ashylǵan kostıým tsehynda tigildi. Sondaı-aq, dekoratsııany da biz alǵash ret tek ózimiz jasap shyqtyq», - dep atap ótti ol.
Onyń aıtýynsha, basty partııada Áıgerim Beketaeva men Taıyr Gataýov; Gaýhar Ýsına men Erkin Rahmetollaev oınaıdy. Al dekoratsııalar men kostıýmder ıtalıandyq sheberler Etsıo Frıdjerıo men Franko Skýarchapıonyń basqarýymen ázirlengen.
QR Eńbek sińirgen qaıratkeri, qoıýshy horeograf Ǵalııa Bóribaevanyń aıtýynsha, jaryq kórgenine 130 jyldan asqan balettiń myńǵa jýyq redaktsııasy bar. «Biz birinshi aktini shamaly redaktsııaladyq. Polonezde ártister sany ózgeredi, úshinshi aktiniń quramy ulǵaıady. Baldaǵy bı de shamaly ózgerip, 32 aqqý basty keıipkerlerdiń kóńil-kúıin beıneleıdi. Jalpy alǵanda sıýjet ózgergen joq, biraq ádette qaıǵyly aıaqtalatyn fınaly HH ǵasyrdyń ekinshi jartysynda qaıta qaralyp, sodan beri aıaq jaǵynda ǵashyqtar baqyt qushady. Al túpnusqada teńiz tasyp, basty keıipkerlerdi tolqyn alyp ketedi», - dep túsindirdi ol.
