«Astana Operada» skrıpkaǵa arnalǵan mınıatıýralar qoıylady
ASTANA. QazAqparat - «Astana Opera» teatrynyń Kameralyq zalynyń repertýaryn «Skrıpkaǵa arnalǵan mınıatıýralar» atty jańa mýzykalyq tsıkl tolyqtyrdy. Jobanyń alǵashqy kontserti 15 shilde kúni ótedi, dep habıýarlaıdy teatrdyń baspasóz qyzmeti.
Kontserttiń baǵdarlamasyna mınıatıýra janrynda jazylǵan Bahtan bastap Pıatstsollaǵa deıingi klassıkterdiń týyndylary engen. Keshte qazaqstandyq shyǵarmalar da oryndalatyn bolady: tyńdaýshylarǵa E.Brýsılovskııdiń «Boz aıǵyr» sıýıtasynan fınal jáne basqalary ázirlenip qoıǵan, sonymen qatar ıspan kompozıtory P.Sarasateniń «Syǵan áýenderi», M.de Falıanyń «Ispan bıleri» jáne ózge shyǵarmalary nazarǵa usynylatyn bolady.
«Biz kesh baǵdarlamasyna mınıatıýralar men keń túrdegi pesalardy engizýdi jón sanadyq. Bálkim, tyńdaýshylardyń ishinen osy janrlardyń birimen tanystyǵy bastalar. Kórermen qaýym beı-jaı qalmaıtynyna senemin, sebebi bul óte ásem áýen. Kontsertke keremet mýzykanttar, atap aıtqanda, «Álemdik akkordeon metri» joǵary lıgasyna engen talantty baıanıst, Qazaqstannyń eńbek sińirgen qaıratkeri Damır Sultanov, tamasha gıtarıst ári óz isiniń sheberi Álibı Asaqaev, kontrabasıst Anatolıı ıAkýshkın, sonymen qatar skrıpkashy Mádına Bekmadıeva jáne teńdessiz pıanıst Dana Dúısenbaeva qatysady», - dedi «Daryn» memlekettik jastar syılyǵynyń laýreaty Asqar Dúısenbaev.
Ónerpazdardyń alǵa qoıǵan maqsaty osylaısha tyńdarmannyń klassıkalyq mýzykaǵa qyzyǵýshylyǵyn oıatý.
«Biz kontsertter tsıklin ótkizýdi josparlap otyrmyz, basqa da qyzyqty shyǵarmalar onyń jalǵasy bolmaq, sebebi skrıpkaǵa arnalǵan mýzyka repertýarynyń aýqymy keń. Árıne, aldymyzǵa qoıǵan negizgi mindet - tyńdarmanymyz tek áserli qýat alyp qana qoımaı, sondaı-aq bizdiń ınterpretatsııalarymyzdan jańa tynys alyp, klassıkalyq mýzykaǵa qyzyǵýshylyǵyn odan ári arttyratyndaı etip jaqsy oınaý», - dep sózin qorytyndylady vırtýoz skrıpkashy Asqar Dúısenbaev.
Eske salar bolsaq, Asqar Dúısenbaev Qazaqstannyń Memlekettik shekti aspaptar kvartetiniń birinshi skrıpkashysy, Metro-Philharmonic Halyqaralyq jastar orkestriniń (Máskeý-Shvetsııa) kontsertmeısteri, «Solıster akademııasy» memlekettik kameralyq orkestriniń kontsertmeısteri bolǵan.
