Astana Operada skrıpka men qobyz dýeti óner kórsetedi
ASTANA. QazAqparat - «Astana Opera» teatrynda tyńdarmandarǵa skrıpka men qobyz úniniń birigýinen quralǵan kompozıtsııalar usynylady, dep habarlaıdy teatrdyń baspasóz qyzmeti.
World Championship of Performing Arts (Los-Andjeles, AQSh) altyn medalderiniń ıegeri Láılá Tájibaeva-Isaeva (prıma qobyz) 19 mamyrda Qazaqstannyń eńbek sińirgen qaıratkeri Baǵdat Ábilhanov (skrıpka), Mádenıet qaıratkeri Aısulý Baıkenova (skrıpka), respýblıkalyq jáne halyqaralyq baıqaýlardyń laýreattary Janar Ahatova (alt) jáne Kýrvanjan Ahatov (vıolonchel) sııaqty belgili mýzykanttarmen birge sahnaǵa shyǵady. Solıster teatrdyń Kameralyq zalynda «Folk & Classic» kontsert qoıady.
Kontsertke jas qobyzshylardan quralǵan «Q kvarteti» qatysady, kontsertmeısteri -Aıjan Omarova.
Kórnekti qazaqstandyq qobyzshy Láılá Tájibaeva-Isaeva osy jyly shyǵarmashylyq qyzmetiniń 20 jyldyǵyn atap ótedi.
- Osy jobany iske asyrý oıy mektepte oqyp júrgen kezimde týyndaǵan. Baǵdat Ábilhanovpen biz burynnan tanyspyz, árdaıym qobyz men skrıpkada dýet bolyp óner kórsetkimiz keletin. Endi mine sol bala kezdegi armanymyzdy júzege asyrmaqshymyz. Mýzykada barlyǵy kórinis tabady. Mysalǵa, qazaq halqy óte qonaqjaı, keńpeıil halyq jáne biz klassıkany ulttyq aspapta oryndaı otyryp, ózimizdiń uǵymymyzǵa beıimdeýge tyrystyq. Osylaısha, biz álemge ashyqtyǵymyzdy kórsetemiz. Al halyq mýzykasyn osy kontsertte klassıkalyq aspaptardyń oryndaýynda tyńdaýǵa bolady. Biz jańa úndesýlermen qalyptasqan tájirıbeni buzý arqyly, burynnan qabyldanǵan normalar sheńberinen shyǵa otyryp, qazaq mýzykasyn nasıhattaımyz. Barlyq baǵdarlama skrıpka men qobyz úniniń birigýinen quralǵan jáne osy keshte biz súıikti, jaıdarly kórermenderimizge skrıpka, qobyz áýenderin, sonymen qatar djaz kompozıtsııalaryn usynamyz,- dep atap ótti Láılá Tajibaeva-Isaeva.
«Folk & Classic» kontsertiniń tyńdarmandaryn belgili qazaqstandyq mýzykanttardyń oryndaýyndaǵy Barokko dáýirinen XXI ǵasyrǵa deıingi klassıkterdiń shyǵarmalary, sondaı-aq ulttyq mýzyka jaýharlary kútedi. Kontsert baǵdarlamasynda A. Vıvaldı, M. de Falıa, Dj. Kern, P. Chaıkovskıı, G. Venıavskıı, R. Şedrın, I. Frolov, A. Pıatstsollanyń, sonymen birge Qurmanǵazy, Mahambet, K. Mýsın, Ǵ. Jubanova, T. Qajyǵalıev, K. Dúısekeev, A. Bestibaev, A. Jaıym, B. Amanjolovtyń jáne taǵy basqa kompozıtorlardyń shyǵarmalary oryndalady.
