«Astana Operada» sheber pıanınoshy Nurlan Izmaılovtyń jeke kontserti ótedi
ASTANA. QazAqparat - Nurlan Izmaılov eńbek jolynyń jarty ǵasyrdan astam ǵumyryn fortepıanoǵa arnady.
QR Eńbek sińirgen qaıratkeri, asqan sheber pıanınoshy erteń, 27 mamyrda «Astana Opera» teatrynyń Kameralyq zalynda ótetin kontsertte óner kórsetedi.
Kesh baǵdarlamasynda kórnekti kompozıtorlardyń tanymal jáne sırek oryndalatyn týyndylary bir-birimen almasyp, al keıbir shyǵarmalar alǵash ret oryndalady. Aıtalyq, S. Rahmanınovtyń V. Kýzovatov jasaǵan transkrıptsııasyndaǵy «Vokalız», Ǵ. Jubanovanyń N. Izmaılov jasaǵan transkrıptsııasyndaǵy «Aq qus týraly ańyz» baletiniń Halyq bıi jáne M. Glınkanyń Vals-fantazııasy. P. Chaıkovskııdiń «Jyl mezgilderi», S. Rahmanınovtyń Tórt kirispesi, 23 shyǵarmanyń №4, 5, 6, 2 belgili áýenderi de kórermendi baýrap alary anyq.
«Sol mınor kirispesi men úshin jeti jasymda kórgen amerıkandyq «Uly Otan» derekti fılmimen baılanysty. Amerıkandyqtar túsirgen sol soǵys týraly fılmi shyndyqqa janasatyn, óte shynaıy edi, olar Keńes áskeri qol jetkizgen jeńisti, sol jaıly sıýjetterdi túsirdi. Ondaǵy umytylmas kadrlar keıin basqa baǵdarlamalarda jáne fılmderde kórinis tapty, mysaly, áskerı aerodromda óte kóp ushqysh boldy, júk kóligi tur, sol júk kóliginde roıal tur jáne S. Rahmanınovtyń Sol mınor kirispesi oınaldy. Sol Kirispeni meniń ustazym Emıl Grıgorııuly Gılels - 20 ǵasyrdyń uly pıanınoshysy oryndady. Keıin men dál sol kisiden dáris alady dep kim oılaǵan. Bertin kele men osy shyǵarmany ustazymnyń kemel jasynda oryndaǵanyn óz kózimmen tamashaladym, árıne bul basqa Kirispe edi, basqa ekpin», - dep eske alady N. Izmaılov.
Atalǵan kontsertte shyrqalatyn orystyń fortepıanolyq mýzykasy erekshe mýzyka tiliniń birtutas dáýirin usynady. Mádenıettiń bul bólshegi myńdaǵan ónersúıer qaýymǵa, solardyń júregine jetý úshin baǵyttalǵan. Qazaq kompozıtory Ǵ. Jubanovanyń «Aq qus jaıly ańyz» atty mýzykasy keshtiń ajaryn asha túsetindigi aıqyn, dep habarlaıdy «Astana Opera» teatrynyń baspasóz qyzmeti.
