Astana Operada Romantızm dáýiriniń erekshe shyǵarmalaryn qamtıtyn kontsert ótedi
ASTANA. QazAqprat - 5 aqpanda «Astana Opera» teatrynyń Kameralyq zalynda «Mýzykanyń altyn ǵasyry» atty serııasynan XIX ǵasyrdyń kompozıtor-romantıkteriniń shyǵarmashylyǵyna arnalǵan aspapty mýzykadan kontsert ótedi.
Bul týraly «Astana opera» teatrynyń baspasóz qyzmeti habarlaıdy.
Kóptegen halyqaralyq konkýrstardyń dıplomanty Dolores Úmbetálıeva (fortepıano), sondaı-aq «Astana Opera» teatry orkestriniń birinshi skrıpkashysy, QR eńbek sińirgen qaıratkeri Baǵdat Ábilhanov jáne «Astana Opera» kameralyq orkestri tyńdarman nazaryna Felıks Mendelson men Antonın Dvorjaktyń týyndylaryn usynady.
«Tyńdarman on toǵyzynshy ǵasyrdaǵydaı, búgin de Romantızm dáýiriniń shyǵarmalaryn erekshe jalyndy jáne emotsııalyq turǵydan mánerli keletindigi úshin unatady», - deıdi Dolores Úmbetálıeva.
Repertýary qazaqstandyq, reseılik jáne sheteldik kompozıtorlardyń týyndylaryn qamtıtyn tamasha skrıpkashy Baǵdat Ábilhanov óziniń romantıkalyq mýzykaǵa degen súıispenshiligi jaıly aıtyp berdi.
«Men Dvorjaktyń romansyn oryndaımyn, ókinishke qaraı, ol Qazaqstanda sırek oryndalady, sondaı-aq Mendelsonnyń orkestrmen oryndalatyn skrıpka jáne fortepıanoǵa arnalǵan kontserti de bar. Mendelson - romantıka taqyrybyn qamtyǵan jarqyn kompozıtorlardyń biri. Sazdylyǵymen esh kem túspeıtin Antonın Dvorjaktyń mýzykasy tabıǵatty ádemi sýretteıdi jáne halqymyzdyń júregine jaqyn keledi», - deıdi ol.
Mýzykadaǵy Romantızm baǵyty XIX ǵasyrdyń jıyrmasynshy jyldary qalyptasty. Mýzykatanýshy Marjan Jákenova, kompozıtor-romantıkter mýzykanyń kómegimen adamnyń ishki álemine tereń úńilip, onyń baılyǵyn jetkizýge tyrysqanyn aıtady.
- Romantıkter kóbinese jeke bastyń dramasyn mýzykaǵa erekshe shynaıylyq beretin ómirbaıandyq reńge boıaıdy. Sol sebepti, dál osy mýzyka óziniń ózgesheligimen adam janynyń qozǵalysyn anaǵurlym tolyqqandy jetkizetindikten, ónerdiń minsiz bir túri dep jarııalanǵany kezdeısoq emes.
Felıks Mendelson ónerge molynan sýsyndaǵan zııaly ortada ósti. Mendelsondyqtardyń úıine jıi baratyn sol zamannyń ataqty tulǵalarynyń biri fılosof F. Gegel, aqyn, memlekettik qaıratker, oıshyl jáne tabıǵat zertteýshisi I.V. Gete jáne basqalary bolatyn. Gektor Berlıozdyń aıtýynsha, «Mendelsonnyń pıanıno oınaýdaǵy sheberligi, onyń kompozıtorlyq kemeńgerligi ispettes asqaq».
