«Astana Operada» romans keshi ótkiziledi
ASTANA. QazAqparat - 19 qyrkúıekte «Romans sıqyry» toptamasy aıasynda Kameralyq zalda ótetin «Júrekten shyqqan ún» kontsertinde «Astana Opera» teatrynyń opera solısteri men orkestr ártisteri óner kórsetedi, dep habarlaıdy QazAqparat.
Osynaý janrdy súıip tyńdaýshylar úshin ataqty kompozıtorlardyń tanymal romanstary men ánderi, aspaptyq jaýhar týyndylary ázirlengen.
Kontsertke Qazaqstannyń eńbek sińirgen qaıratkeri (soprano) Aıgúl Nııazova, Qazaqstannyń eńbek sińirgen qaıratkeri (metstso-soprano) Dına Hamzına, Elena Ganja (soprano), Ramzat Balakıshıev (tenor), Bolat Esimhanov (bas), Qazaqstannyń eńbek sińirgen ártisi (skrıpka) Maqpal Bekmaǵambetova, halyqaralyq baıqaýlardyń laýreaty (vıolonchel) Asqar Muqanov qatysady. Fortepıano partııasynda - halyqaralyq baıqaýlardyń laýreaty Raýshan Beskempirova.
«Bul mýzykalyq toptamanyń kontsertterin elordalyq tyńdarman jaqsy kóredi. Kesh baǵdarlamasyna kóne romanstar, sonymen qatar M.I.Glınka, P.I.Chaıkovskıı, N.A.Rımskıı-Korsakov syndy orys kompozıtorlarynyń romanstary endi. «Kúmis ǵasyry» aqyndarynyń óleńderinen shabyttanǵan keremet sazdy áýenderdiń úılesimi keshtiń poetıkalyq kóńil-kúıine arqaý bolmaq. Árıne, kontserttiń basty taqyryby - «mahabbat», degenmen baǵdarlamaǵa jyldyń eń kórikti mezgili - kúzge arnalǵan romanstarda engen. Vokaldyq mýzykadan bólek, aspaptyq áýender de shyrqalady. Vıolonchelıst Asqar Muqanov pen skrıpkashy Maqpal Bekmaǵambetovanyń ınterpretatsııasynda tanymal ári sırek oryndalatyn týyndylar tyńdarmanǵa jol tartady», - dedi kontserttiń avtory Raýshan Beskempirova.
Qazaqstannyń eńbek sińirgen qaıratkeri soprano Aıgúl Nııazova kontsert baǵdarlamasynyń tyńdarmandarmen syrly suhbat qurýǵa jaǵdaı jasaıtynyn atap ótti.
«Daıyndyq barysynda Ramzat Balakıshıev ekeýmiz daýystarymyzdyń keremet úılesetinin ańǵardyq, bul ansamblde oryndaý kezinde asa mańyzdy. Biz A.E.Varlamovtyń «Gornye vershıny», S.I.Taneevtyń «Kak nejısh ty, serebrıanaıa noch» syndy lırıkalyq dýetterdi oryndaımyz, sondaı-aq A.S.Dargomyjskııdiń ázilge toly «Vanka - Tanka» dýeti de shyrqalady. Bul akterlik sheberlikti talap etedi, biraq tyńdaýshy qaýymnyń kóńilinen shyǵady dep senemiz. Budan ózge, kóptegen jańa týyndylar oryn alady, sebebi, biz, ártister, kameralyq oryndaýshylyqta ósip-órkendegimiz keledi ári tyńdaýshylarymyzǵa jańa shyǵarmalarmen tanysý óte qyzyqty bolary sózsiz», - dep qorytyndylady Aıgúl Nııazova.
