«Astana Operada» polshalyq qas sheber alǵash ret óner kórsetedi

Bul týraly «Astana Opera» teatrynyń baspasóz qyzmeti habarlaıdy.

Valechektiń óneri Eýropa, AQSh, Kanada, Japonııa, Argentına, Iordanııa, Reseı jáne basqa elderde joǵary baǵaǵa ıe bolǵan.

Oryndaý sheberliginiń san qyryn meńgergendigimen áıgili Voıtseh Valechek fortepıanolyq ónerdiń eki túrli stılin qalaı joǵary ıgergenin pash etedi. Áıgili pıanınoshy astanalyq turǵyndardy Romantızm dáýiriniń eki ókili - zamandastar Ferents Lısttiń jáne Frederık Shopenniń shyǵarmalaryn oryndap qýantady.

- Bul meniń Qazaqstanǵa alǵash kelýim. Qazaqstan halqymen, onyń mádenıetimen jáne tarıhymen jaqyn tanysatyn kúndi asyǵa kútemin. «Astana Opera» teatry jaıly tolyǵyraq bilgim keledi, bul maǵan óte qyzyq, onyń repertýarymen tanyssam, qazaqstandyq tyńdarmanǵa polshalyq jáne vengrlyq kompozıtorlardyń týyndylaryn oryndap bersem deımin. Ferents Lısttiń shyǵarmashylyǵy janyma óte jaqyn jáne ol tipti doktorlyq dıssertatsııamnyń taqyryby bolyp tabylady. Men onyń mýzykasyna eki albom jazdym, qazir taǵy bireýin daıyndap jatyrmyn. Frederık Shopenniń mýzykasy kópke asa tanymal, alaıda men onyń shyǵarmalaryn ózimniń oryndaýymda kórsetkim keledi, - deıdi oıymen bólisken Voıtseh Valechek.

Kesh baǵdarlamasynda F. Lısttiń Paganını kaprısinen úsh etıýd, F. Shopenniń «Tamasha Varıatsııalary» jáne úsh valsi, sondaı-aq F. Lısttiń fortepıanolyq transkrıptsııasy jáne F. Shopenniń alty polshalyq áni qamtylǵan.

- Vengrlyq mekteptiń alyp tulǵasy bolyp keletin Ferents Lısttiń jarqyraǵan týyndylary qýatty, aıbyndy, boıaýy qanyq, asqaq keledi. Ol sımfonııalyq orkestrdiń oınaǵanyn fortepıano arqyly kórsetedi. F. Lısttiń asqan sheberlikpen oınaǵany jáne sheksiz tehnıkalyq múmkindikteri kúni búginge deıin búgingi pıanınoshylar úshin baǵyt-baǵdar beredi. Onyń týyndylarynyń janrlyq aýqymy óte keń. Frederık Shopen bolsa, fortepıano aqyny edi. Polshanyń uly kompozıtorynyń mýzykalyq stıli náziktigimen, ásemdigimen, kórkemdigimen erekshelenedi. F. Shopen fortepıanonyń dybystary arqyly óziniń ishki jan dúnıesin pash ete otyryp ómir fılosofııasyn óte názik tilmen jetkizdi, - deıdi mýzykatanýshy Marjan Jákenova.

Voıtseh Valechek - Nıý-Iorktegi Artýr Rýbınshteın atyndaǵy (AQSh) jasóspirimderdiń halyqaralyq konkýrsy, Parma qalasyndaǵy F. Lıst atyndaǵy (Italııa) halyqaralyq konkýrsy, Palermodaǵy (Italııa) pıanınoshylardyń halyqaralyq konkýrsy jáne basqa kóptegen halyqaralyq konkýrstardyń laýreaty. Jeke kontsertterimen qatar Varshavadaǵy Polshalyq radıonyń orkestri, Krakovtaǵy Bethovenniń akademııalyq orkestri, Ammannyń sımfonııalyq orkestri jáne basqa da birqatar kameralyq ansambldermen jáne sımfonııalyq orkestrlermen óner kórsetedi.

Kontsert Qazaqstandaǵy Polsha jáne Vengrııa elshilikteriniń qoldaýymen ótedi: 19:00 bastalady, bılet baǵasy 1 500 teńge.