«Astana Operada» nemis klassıgi Bramstyń áýenderi shyrqalady
ASTANA. QazAqparat - 30 shildede «Astana Operanyń» kameralyq zalynda «Bramsty súıesiz be?» kontserti ótedi. Bul týraly teatrdyń baspasóz qyzmeti habarlady.
Oǵan keremet aspapshylar - Qazaqstannyń eńbek sińirgen qaıratkeri Baǵdat Ábilhanov (skrıpka), halyqaralyq baıqaýlardyń laýreaty Pavel Romanenko (alt), halyqaralyq baıqaýlardyń laýreaty Kýrvanjan Ahatov (vıolonchel), Ulan Qulmametov (fortepıano) qatysady.
«Bramsty súıesiz be?» - 1961 jyly tanymal frantsýz jáne amerıkalyq ártisterdiń qatysýymen melodrama túsirilgen Fransýaza Sagannyń povesi osylaı atalady. Fılmniń negizgi mýzykalyq jelisi Bramstyń Úshinshi sımfonııasynyń bastapqy akkordtary boldy. Kontsertte nemis romantızminiń klassıgi Iogannes Bramstyń sımfonııalyq emes, kameralyq-aspaptyq áýenderi shyrqalady. Ony kameralyq ansambldiń tabıǵatyn názik sezine biletin, nemis klassıkalyq mýzykasynyń tamasha ınterpretator mýzykanttary oryndaıtyn bolady.
Shaqyrylǵan altıst Pavel Romanenko «Astana Operanyń» kameralyq zalynda buǵan deıin de óner kórsetken.
«Bul kontsert men úshin úlken oqıǵa. Sebebi menimen birge sahna tórine keremet mýzykanttar shyǵady. Olardyń árqaısysy - jarqyn shyǵarmashylyq tulǵa. Aýyz toltyryp aıtatyn sheber mýzykanttar. Áýenge degen qyzyǵýshylyqtarymyzdan bólek, bizdi eskirmeıtin adal dostyq baılanystyrýda. Sondyqtan daıyndyq barysynan erekshe rahat alýdamyz! Biz Bramsty bekerden beker tańdaǵan joqpyz. Úlken kólemdi ǵajaıyp kameralyq mýzykany jazǵan uly kompozıtordyń áýenderi barynsha kóbirek shyrqalýy tıis. Bramstyń shyǵarmashylyǵyn ár qyrynan kórsetkimiz keldi. Eń alǵashqy (№1 fortepıano kvarteti) jáne keıingi (Alt, vıolonchel jáne fortepıanoǵa arnalǵan trıo) eńbegin salystyrý arqyly kórermenge Bramstyń shyǵarmashylyǵy jas ereksheligine jáne ómirlik tájirıbesine qaraı qalaı ózgergenin kórsetemiz. Biraq, ár kórermen onyń buljymas ári teńdessiz stılin sezine alady», - dep atap ótti Pavel Romanenko.
Baǵdarlamada I.Bramstyń Alt pen fortepıanoǵa arnalǵan skertso, do mınor, Alt, vıolonchel men fortepıanoǵa arnalǵan trıo lıa mınor, or.114, Fortepıano, skrıpka, alt jáne vıolonchelge arnalǵan kvartet №1 sol mınor, or.25 týyndylary oryndalady.
