«Astana Operada» mahabbat sezimine arnalǵan týyndylar oınalady
ASTANA. QazAqparat - 18 qarasha kúni «Astana Opera» teatrynyń Kameralyq zaly sahnasynda «Bel Canto mýzykalyq salony» toptamasynan «Mahabbat joly» kontserti qoıylady, dep habarlaıdy QazAqparat.
Kontsertke opera trýppasynyń keremet solısteri - Qazaqstannyń eńbek sińirgen qaıratkerleri Aıgúl Nııazova, Margarıta Dvoretskaıa, halyqaralyq baıqaýlardyń laýreattary Bolat Esimhanov, Gúljanat Sapaqova, Malıka Mınızını, Elena Ganja, Ramzat Balakıshıev, Batyrjan Smaqov qatysady. Olarmen birge daryndy aspapshylar - halyqaralyq baıqaýlardyń laýreattary Aıda Ábdiqadyrova (fleıta), Dana Ábdiqadyrova, Raýshan Beskempirova (fortepıano) óz ónerlerin ortaǵa salmaq.
Astanalyq teatr solısteri san alýan vokaldyq boıaýlary, ádemi qanyq úni men minsiz tehnıkasy syndy tamasha daýys ıgerý qabiletin, sondaı-aq beıneni ártistik turǵydan jetkizý sheberligin pash etpek. «Mahabbat joly» kontserttik baǵdarlamasynda álemdik mýzykalyq klassıkanyń úzdik úlgileri usynylady. Kórnekti batys eýropalyq kompozıtorlardyń tanymal operalary, qulaqqa sińgen ánderi men romanstarynan arııalar jáne dýetter shyrqalady.
«Kontserttiń «Mahabbat joly» ataýy ár adamnyń ómirlik jolynda mahabbat tárizdi asqaq sezim serik bolady degen oıǵa jeteleıdi. Besikte terbelgen sábı kishkentaıynan ana mahabbatyn sezinip, keıin ol sezim - Otanyna, ómirge degen súıispenshilikke, romantıkalyq mahabbatqa aınalady. Mahabbat lırıkasy kóptegen uly aqyndar, sýretshiler men kompozıtorlar shyǵarmashylyǵynyń basty taqyrybyna aınaldy. Osy kontsertte V.Bellını, G.Donıtsettı, R.Shýman, F.Legar jáne de basqa avtorlardyń týyndylaryn oryndaımyn», - dedi tanymal soprano ánshi, teatrdyń jetekshi solısi Aıgúl Nııazova.
