«Astana Operada» Qazaqstan men Reseıdiń skrıpkashylary óner kórsetedi
ASTANA. QazAqparat - 6 mamyr kúni «Astana Opera» teatrynda Qazaqstan men Reseıdiń skrıpkashylary óner kórsetedi, dep habarlaıdy QazAqparat.
Elordalyq teatrdyń Kameralyq zal sahnasyna skrıpkashy mýzykanttar - «Astana Opera» Sımfonııalyq orkestriniń solısteri Qazaqstannyń eńbek sińirgen qaıratkeri Baǵdat Ábilhanov jáne Aısulý Baıkenova, Reseıdiń eńbek sińirgen ártisi Alekseı Lýndın men kóptegen halyqaralyq baıqaýlardyń laýreaty Jandos Muhamedı shyǵady. «Mýzykalyq qıylys» toptamasyndaǵy kontsertke dırıjer Rýslan Baımýrzınnyń jetekshiligimen «Astana Opera» Kameralyq orkestri qatysady.
Mýzykalyq kesh avtorlary Baǵdat Ábilhanov pen Aısulý Baıkenova bul joly jaqyn dostary - tamasha solıster Alekseı Lýndınmen, Jandos Muhamedıdi kútýde.
«Vırtýozy Moskvy» kameralyq orkestriniń birinshi skrıpkasy Alekseı Lýndın stıliniń erekshe kúshi, sezimi ári názik talǵamy mýzykalyq oı tazalyǵymen kórermenniń nazaryn ózine aýdartady. Bıylǵy naýryz aıynda Kameralyq zal sahnasynda alǵash óner kórsetip, aıryqsha sheberligi, ártistigi, tamasha oryndaý tehnıkasymen tyńdarmandaryn tánti etken talantty jas oryndaýshy Jandos Muhamedı syndy ol da elordalyq kórermenge jaqsy tanys.
Mazmundy kontsert baǵdarlamasyna P.Chaıkovskııdiń orkestrmen skrıpkaǵa arnalǵan tańdaýly shyǵarmalary - Tolǵaný, Skertso, Áýen, Muńdy serenada, Vals - skertsosy engen. Áıgili klassıktiń bes psasynyń tıimdiligi, beıneliligi, kórkemdiligi, sheberligi solısten aspapty úzdik deńgeıde ıgerýin talap etedi. Bul pesalar aıtýly kompozıtordyń eń kóp oryndalatyn ári tyńdaýshylardyń eń súıikti skrıpkalyq shyǵarmalary qataryna jatady.
Aty ańyzǵa aınalǵan Astor Pıatstsollanyń eń tanymal týyndylarynyń biri - «Tango tarıhy» sıýıtasy oryndalady. Tórt bólimdi týyndy tango mýzykasynyń tarıhy men damý kezeńi jaıly tyńdarmanǵa syr shertedi. Birinshi bólimi - «Bordel 1900». Bul ásemdik pen jyldamdyqqa toly qarqyndy, jalyndy tango. Tangonyń ekinshi dáýiri - «Kafe 1930». Bul kezeńde janr tolyqtaı ózgeriske ushyrap, barynsha mýzykalyq jáne romantıkalyq bola bastady. Endi tango bı alańdarynan aýysyp, kontserttik zaldarǵa kóshýde. «Túngi klýb 1960» - tangonyń jańa ári qarqyndy damý ýaqyty, onyń keıbir ózindik túrlerinde máni tereń revolıýtsııalyq ózgeristerge ushyraǵan sáti. «Kontsert búgin» - týyndynyń tórtinshi bóligi. Kóptegen kompozıtorlar, sonyń ishinde klassıkter tangony zamanaýı mýzykamen aralastyra otyryp, onyń áýenderin paıdalanady. Osydan bolashaqtyń tangosy paıda bolady.
