«Astana Operada» «Qaragóz» ulttyq baletiniń tusaýkeseri ótedi
ASTANA. QazAqparat - 5 jeltoqsanda «Astana Operada» qazaqtyń kórnekti kompozıtory Ǵazıza Jubanovanyń mýzykasyna qoıylatyn «Qaragóz» ulttyq baletiniń tusaýkeseri ótedi, dep habarlady teatrdyń baspasóz qyzmetinen.
Balettiń qoıýshy horeografy - Eýropalyq balet akademııasynyń professory, halyqaralyq baletmeısterler konkýrstarynyń laýreaty Vakıl Ýsmanov (Avstrııa). Qoıýshy dırıjeri - QR Eńbek sińirgen qaıratkeri Abzal Muhıtdınov (Qazaqstan).
Basty partııalarda óner kórsetetin «Astana Opera» teatrynyń jetekshi solıstteri: Qaragózdiń rólinde Mádına Baspaeva, Ánel Rústemova oınaıdy. Syrym partııasyn Baqtııar Adamjan, Arman Orazov somdasa, Narshany Taıyr Gataýov, Dosjan Tabyldy bıleıdi, Marjan - Gaýhar Ýsına. Sıýjet boıynsha Qaragóz - baı-qýatty Óser rýynyń ataqty Marjan báıbishesiniń súıikti nemeresi, qudiretti Dosan rýynan shyqqan Narsha esimdi jigitke kúıeýge shyqqaly júr. Alaıda oǵan anasynan berilgen tuqym qýalaıtyn psıhıkalyq aýrý syr beredi. Qalyńdyqpen ázildesemiz dep qurbylarynyń biri Narsha, basqalary ıneliktiń beınesinde bolyp kıinedi. Mundaı qaljyńnan qorqyp qalǵan Qaragóz aıdalaǵa qashyp, adasyp ketedi. Oǵan kómekke óziniń burynnan bergi dosy - jas ta, kórikti Syrym sal keledi. Kezinde ekeýin ortaq qaıǵy - analarynan jastaıynan qalǵandary jaqyndastyryp edi. Osydan keıin Qaragózdiń bolashaq kúıeýine degen bar sezimi qutqarýshy Syrymǵa aýyp, buǵan deıin ózine beımálim bolyp kelgen mahabbat álemine esik ashady. Alaıda ǵasyrlardan kele jatqan dástúrler sezimnen de berik edi, sol sebepti qyzdy ony súıetin, alaıda ózi qalamaıtyn Narshaǵa kúıeýge beredi. Qaragóz Syrymǵa qashyp ketedi, biraq qashqyndardy qýǵynshylar ustap alady. Qaragóz birjola esinen adasady. Ómirmen qosh aıtysar aldynda ǵana esin jıyp, qymbatty jandary - Syrym men Narshany kóredi, olar bolsa, qyz úshin ómirlerin qııýǵa daıyn-aq, alaıda Qaragóz sol sátte kóz jumady. Ol óziniń aşy baqytsyzdyǵynan baqyt tabady. - Biz jumysymyzda horeograf Vakıl Ýsmanovtyń ıdeıasyn júzege asyrýǵa tyrystyq. Maǵynasy jaǵynan bul kompozııalyq deńgeıi únemi serpindi túrde órbıtin klassıkalyq qoıylym. Baıandaýy, birinshi akttegi shyndyq ekinshi aktta ishinara qııalǵa aýysady. «Qaragóz» baletiniń stsenografııasy - bul baǵyttar, pishinder, tús pen jaryqtyń selbesýi. Jumys barysynda biz teatrdyń barlyq tehnıkalyq múmkindigin eskerýge tyrystyq, - deıdi spektakldiń qoıýshy sýretshileriniń biri Sofıa Tasmaǵambetova.
