«Astana Operada» gala-balet aıasynda jańa baǵdarlama usynylady
ASTANA. QazAqparat - Reseıdiń halyq ártisi Altynaı Asylmuratova kórkemdik jetekshilik etetin «Astana Opera» baletiniń trýppasy elordalyq kórermen nazaryna jańa kontserttik baǵdarlama usynady, dep habarlady teatrdyń baspasóz qyzmetinen.
22 mamyrda Úlken zal sahnasynda ótetin Gala-balet aıasynda, XX ǵasyrdyń ataqty baletmeısteri Rolan Petıdiń horeografııalyq nómerleri - belgili «Karmen» baletinen pa-de-de jáne «Meniń Pavlovam» baletinen «Leda men aqqý» pa-de-de-siniń tusaýy kesiledi.
Keshte solıstter álemdik balet klassıkasynyń jaýharlary men zamanaýı horeografııa úlgileri - Ts. Pýnıdiń «Esmeralda» baletinen pa-de-sıs, L. Mınkýstyń «Don Kıhotynan» gran-pa, A. Adannyń «Korsarynan» jáne R. Drıgonyń «Arlekınada» men «Talısmanynan», B. Asafevtiń «Parıj jalynynan» pa-de-de, A. Hachatýrıannyń «Gaıane» baletinen «Qylyshtarmen bıin», R. Petıdiń horeografııasyndaǵy «Meniń Pavlovam» baletinen «Taıs» jáne taǵy basqalardy oryndaıdy.
Kontsertke qatysatyn klassıkalyq bıdiń sheberleri: Qazaqstannyń eńbek sińirgen qaıratkerleri M. Baspaeva, G. Ýsına, T. Ǵataýov, J. Áýbákirov, R. Seıitpekov, halyqaralyq baıqaýlardyń laýreattary Á. Beketaeva, Á. Rústemova, B. Adamjan, E. Rahmetollaev, Á. Qusaıynova, S. Naqyspekov, A. Orazov, N. Aımuhametova, A. Zaklınskaıa, J. Ahmedıev jáne basqalary. Sondaı-aq óziniń ónerimen kórermendi «Astana Opera» baleti trýppasynyń ártisteri men dırıjer Arman Orazǵalıev basshylyq etetin teatrdyń Sımfonııalyq orkestri qýantady.
