«Astana Operada» eston mýzykasynyń kontserti ótti
ASTANA. KAZINFORM — Álemge áıgili kompozıtorlar Arvo Pıarttyń 90 jyldyǵy men Velo Tormıstyń 95 jyldyǵyna oraı «Astana Opera» sahnasynda eston mýzykasynyń keshi uıymdastyryldy. Kontsertte XX–XXI ǵasyrda ómir súrgen eki uly tulǵanyń shyǵarmalary oryndaldy. Mýzykalyq kesh Estonııa Prezıdenti Alar Karıstiń Qazaqstanǵa memlekettik sapary aıasynda ótti. Bul týraly Mádenıet jáne aqparat mınıstrligi málim etti.
— Búgingi keshte biz Estonııa men Qazaqstan arasyndaǵy dostyqty mýzyka arqyly atap ótemiz. Mýzyka — eston mádenıeti men bolmysynyń ajyramas bóligi. Men jáne jubaıym Sıre, sondaı-aq búkil delegatsııa erekshe yqylasqa bólendik. Bul bizdiń esimizde uzaq saqtalady. Árbir ádemi estelik — alǵys aıtýǵa sebep. Sondyqtan Prezıdent Toqaevqa jyly qabyldaǵany úshin shyn júrekten rızashylyǵymdy bildiremin. Búkil delegatsııamyzdyń atynan osy sapardy uıymdastyrýǵa atsalysqan barlyq qazaqstandyq áriptesterimizge jáne úkimet ókilderine alǵys aıtamyn, — dedi Alar Karıs.
Sonymen qatar Estonııa Prezıdenti eston kompanııasy Arqalyq qalasyndaǵy mektepke pıanıno syıǵa tartqanyn atap ótti.
– Shamamen 670 shaqyrym qashyqtyqta, jaqyn arada Estonııanyń eki ǵasyrǵa jýyq óndiristik dástúrimen jasalǵan aspaptyń úni shyrqalmaq. Osylaısha, Estonııa men Qazaqstan arasyndaǵy dostyqtyń áýeni tek Astanada ǵana emes, odan tys jerlerde de taraıdy, — dedi Karıs myrza.
Estonııadan kelgen qonaqtar men mýzykanttardy Qazaqstan Respýblıkasynyń Mádenıet jáne aqparat mınıstri qarsy aldy.
– Búgingi kesh — eki túrli mádenıet pen mýzykalyq dástúrdi biriktirip otyrǵan erekshe oqıǵa. Mýzyka úshin, jalpy óner úshin, shekara joq. Ol júrekterdi baılanystyrady, ultyna nemese shyǵý tegine qaramastan, barshaǵa ortaq sezimderdi jetkizedi. Estondyq mýzykanttardyń „Astana Opera“ sahnasynda óner kórsetýi — ózara qurmet pen shabytqa negizdelgen mádenı dıalogtyń jalǵasy dep bilemin, — dedi Aıda Balaeva.
Keshte kórermen Arvo Pıart pen Velo Tormıstiń týyndylaryn tyńdady. Olardy Vanalinna Hariduskolleegium ishekti aspaptar orkestri men Skandınavııadaǵy belgili jas mýzykanttardyń biri, sheber skrıpkashy Hans Krıstıan Aavık oryndady. Kontsert dırıjeri Eston mýzyka jáne teatr akademııasynyń túlegi, sımfonııa, eki opera, kantattar men kóptegen orkestrlik jáne kameralyq týyndylardyń avtory, kompozıtor ári dırıjer Rasmýs Pýýr boldy.
Aıta keteıik, búgin Qasym-Jomart Toqaev Estonııa Prezıdentin Aqordada qarsy aldy.