Astana Operada Djýzeppe Verdıdiń «Travıatasy» anshlagpen ótti
ASTANA. KAZINFORM — «Astana Opera» teatrynda Djýzeppe Verdıdiń «Travıata» operasy juldyzdy qurammen sahnalanyp, zal kórermenge lyq toldy. Ártisterge erekshe qurmettiń belgisi retinde spektakl qatysýshylaryna Qazaqstan Respýblıkasynyń Prezıdenti Qasym-Jomart Toqaevtyń atynan yqylas gúli tabystaldy. Bul týraly Mádenıet jáne aqparat mınıstrligi málim etti.
Bul keshte basty partııalardy opera óneriniń tanymal sheberleri oryndady. Vıoletta Valerı beınesinde soprano Marııa Mýdrıak óner kórsetti. Bul spektakl ánshi úshin erekshe mánge ıe. Osydan dál on jyl buryn Marııa Mýdrıak «Astana Opera» sahnasynda osy rólmen debıýt jasaǵan edi. Osy ýaqyt ishinde Vıoletta partııasy onyń shyǵarmashylyq ómirinde mańyzdy oryn alyp, jańa emotsııalyq jáne dramalyq qyrynan ashyldy.
Alfred Jermon partııasyn alǵash ret ıspandyq tenor Joel Prıeto oryndady. Onyń qatysýy keshtiń basty oqıǵalarynyń birine aınaldy. Ánshi úshin bul jańa partııadaǵy debıýt qana emes, sonymen qatar Qazaqstanǵa jasaǵan alǵashqy sapary boldy. Joel Prıeto Kovent-Garden, La Skala, Parıj ulttyq operasy jáne Zaltsbýrg festıvali sııaqty álemniń iri sahnalarynda óner kórsetken.
Jorj Jermon beınesin Qazaqstannyń Eńbek sińirgen qaıratkeri Talgat Musabaev somdap, qoıylymnyń dramalyq qýatyn arttyryp, sahnalyq kórkemdigin aıqyndaı tústi. Dırıjerlik pýltte ıtalııalyq maestro Djýzeppe Akýavıva turdy. Solıstermen birge sahnaǵa «Astana Opera» teatrynyń hory, mımans ártisteri jáne sımfonııalyq orkestri shyqty.
Aıta keteıik, «Astana Opera» Beıbitshilik jáne kelisim saraıynda jańa sahnalyq alańyn ashqan edi.
