«Astana Operada» aýstrııalyq uly kompozıtorlardyń týyndylary oınalady
ASTANA. QazAqparat - 10 sáýirde «Astana Operanyń» kameralyq zalynda «Máńgilik vena klassıkasy» shyrqalady, dep habarlaıdy QazAqparat teatrdyń baspasóz qyzmetine silteme jasaı otyryp.
Aýstrııalyq uly kompozıtorlardyń týyndylary dırıjer Eldar Saparaevtyń jetekshiligimen «Astana Opera» kameralyq orkestriniń oryndaýynda kórermen nazaryna usynylatyn bolady. Solıst - Qazaqstannyń eńbek sińirgen qaıratkeri, teatr orkestriniń solısi, keremet skrıpkashy Baǵdat Ábilhanov.
Áıgili vıolonchelıst, «Venalyq sımfonıetta» orkestriniń dırıjeri, Germanııadaǵy Ońtústik-Batys fılarmonııalyq orkestriniń kontsertmeısteri, Shtýtgarttaǵy I.S.Bah atyndaǵy akademııanyń múshesi, tanymal «Kelnniń fılarmonııalyq vıolonchelısteri» vıolonchel sekstetasynyń qatysýshysy Eldar Saparaev kontsertke atsalysady. Ol Tonhale (Tsıýrıh), Lısıng zaly (Zagreb), Berlın fılarmonııasy, Ýolt Dısneı-holl (Los-Andjeles) syndy aıtýly sahnalarda óner kórsetýde. Mýzykant Qazaqstan qalalarynda jıi gastroldik saparmen bolyp, birneshe ret «Astana Opera» teatrynyń sahna tórine shyqqan.
Kesh baǵdarlamasyna V.A.Motsarttyń ǵajaıyp, demokratııashyl ári pálsapalyq «Sıqyrly fleıta» operasyna jazylǵan kóńildi de shýaǵyn shashqan ývertıýra endi. Dástúrli zıngshpıl janrynda jazylǵan ertegi-opera mýzykalyq teatrdaǵy eń tanymal spektaklderdiń birine aınaldy. Mánerli tásilderiniń moldyǵy, gýmanıstik mazmuny men shabytqa toly áýendiligi arqasynda shyǵarma barlyq álemdik opera sahnalarynda saltanat qurdy.
Sondaı-aq mýzykanttar I.Gaıdnnyń №85 sımfonııa sı-bemol majoryn usynady. Aýstrııalyq klassıktiń shyǵarmashylyǵyna tabynýshylar bul týyndyny «Patshaıym» dep atap ketken, sebebi atalǵan sımfonııany frantsýz patshaıymy Marııa-Antýanetta erekshe súıip tyńdaǵan. I.Gaıdnnyń mýzykasyndaǵydaı, onyń dúnıetanymynda da ómirge degen úılesimdi ári aıqyn kózqaras basym, sonyń nátıjesinde sımfonııany júıelilik, beınelilik, qanyqtyq, ózgermes senimdilik pen jarasymdy ázil sıpattaıdy.
«Astana Opera» Sımfonııalyq orkestriniń solısi Baǵdat Ábilhanovtyń oryndaýynda V.Motsarttyń eń ataqty skrıpkalyq kontserti - orkestrmen skrıpkaǵa arnalǵan №5 kontsert lıa major shyrqalady.
«V.Motsarttyń skrıpkaǵa arnalǵan besinshi kontserti - kemeńger kompozıtor shyǵarmashylyǵynyń naǵyz jaýhary, XVIII ǵasyrdaǵy kontsert stıliniń asqar shyńy. Týyndy ózindik ereksheligimen, ǵajaıyp qurylymymen, teatrlyǵymen, asqaq jalynymen, ásemdigimen jáne qýlyǵymen ózgeshelenedi. Biregeı úshinshi bóliginiń arqasynda kontsert «Túrik» ataýyna ıe bolǵan. Sol zamandaǵy qalyptasqan «jaqsy minez erejesine» qaramastan, kerbez menýette (kóne frantsýz bıi) kenetten halyq arasynan shyqqan «kóshe» keıipkeri - sol ýaqytta sánge aınalǵan «túrik» mýzykasyna eliktep, bıge basqan syǵan paıda bolady. Kontserttiń sońy shyǵarmashylyq rýhtyń erkindigin madaqtaıtyn batyl serpilis boldy», - dep atap ótti Baǵdat Ábilhanov.
