«Astana Operada» ataqty kompozıtor Erkeǵalı Rahmadıevke arnalǵan kontsert ótedi
ASTANA. QazAqparat - 25 qazan kúni «Astana Operanyń» Kameralyq zalynda ataqty qazaq kompozıtory Erkeǵalı Rahmadıevtiń 85 jyldyǵyna arnalǵan «Týǵan jer týraly jyr» kontserti ótedi.
Eske alý keshinde teatrdyń jetekshi opera solısteri, orkestr jáne kameralyq hor ártisteriniń oryndaýynda otandyq klassıktiń shyǵarmashylyq murasynan asqaq týyndylar bolady, dep habarlaıdy teatrdyń baspasóz qyzmeti.
Kópshilikke tanys «Tań samaly», «Bala ǵashyq», «Jetisýdyń qyzdary-aı» týyndylary, «Qamar-sulý» operasynan dýet, «Alpamys» operasynan Gúlbarshyn arııasy, hor kompozıtsııalary jáne t.b. shyrqalady.
Kontsertke «Astana Operanyń» jetekshi solısteri, Qazaqstannyń eńbek sińirgen qaıratkerleri - soprano Jupar Ǵabdýllına men tanymal tenor Medet Shotabaev, teatr solısteri - Qazaqstannyń eńbek sińirgen qaıratkeri Bıbigúl Januzaq, halyqaralyq baıqaýlardyń laýreattary Aızada Kaponova, Beıimbet Tańaryqov qatysady. Sonymen qatar talantty jas vokalıster, E. Rahmadıev atyndaǵy halyqaralyq baıqaýlardyń laýreattary Ulpan Áýbákirova men Almat Іzbambetov óz ónerin kórermenge pash etpek. Bas hormeıster - Qazaqstannyń eńbek sińirgen qaıratkeri Erjan Dáýitov. Fortepıano partııasy - halyqaralyq baıqaýlardyń laýreaty Raýshan Beskempirova.
Teatrdyń shyǵarmashylyq tolqynyna shaqyrylǵan solıster de qosylatyn bolady. Atap óter bolsaq: Qazaqstan Respýblıkasynyń eńbek sińirgen ártisi Shahımardan Ábilov, Qazaqstannyń eńbek sińirgen qaıratkeri Azamat Jyltyrkózov, halyqaralyq baıqaýlardyń laýreaty Ermek Qasym, E. Rahmadıev atyndaǵy halyqaralyq baıqaýdyń laýreaty Erbol Muqanov.
- Kontsertimizdi uly sheber Erkeǵalı Rahmadıevke arnap otyrmyz. Onyń shyǵarmashylyq qýaty kóptegen qazaqstandyq mýzykanttar býynyn shabyttandyrýda. Jyldar boıy jınaǵan bilim-tájirıbesin áriptesteri, shákirtterimen aıanbaı bólisken. Erkeǵalı Rahmadıuly shyǵarmalardy túsindirýde jas oryndaýshylarmen jeke dara jumys jasaǵan. Atap aıtqanda, maǵan jáne áriptesterim Medet Shotabaev, Azamat Jyltyrkózovke aqyl-keńes bergen. Búgin sahna tórine shyǵatyn ónerpazdardyń basym kópshiligi «Qamar-sulý» operasynyń qoıylymyna tikeleı qatysqan edi. Onyń shyǵarmashylyq qyzmetiniń arqasynda, otandyq mýzyka óneriniń úlgileri álemdik klassıka jaýharlaryna aınaldy. Onyń mýzykasy, sazdy áýeni máńgi jadymyzda, júregimizde shyrqalatyn bolady, - dep atap ótti Jupar Ǵabdýllına.
