Astana Operada «Alqyzyl jelken» mıýzkliniń tusaýkeseri ótedi
NUR-SULTAN. QazAqparat - Búgin «Astana Opera» teatrynda Qaraǵandy akademııalyq mýzykalyq komedııa teatrynyń shyǵarmashylyq ujymy elorda turǵyndary men qonaqtarynyń nazaryna Maksım Dýnaevskııdiń «Alqyzyl jelken» mıýzıklin usynady, dep habarlaıdy QazAqparat tilshisi.
Qaraǵandylyq teatr repertýaryndaǵy 2018 jyldyń qazan aıynda tusaýy kesilgen jańa spektaklderiniń biri – M.Dýnaevskııdiń «Alqyzyl jelken» qoıylymy. Týyndynyń negizgi ıdeıasy – ár adamnyń jaqyny úshin ǵajap dúnıeler jasaı alatyndyǵy týraly berik senim men asqaq arman.
Qoıýshy rejısseri – «Zolotaıa maska», «Jyl adamy», «Melpomena», «Jyl áni» syılyqtarynyń ıegeri Sýsanna Tsırıýk (Sankt-Peterbor, Reseı),
«Qandaı janrmen jumys istesem de, qandaı qoıylymdy sahnalasam da men úshin spektakldiń qyzyqty bolýy barynsha mańyzdy. Qoıylym emotsıonaldy bolýy tıis. Sebebi adamdar teatrǵa jandy emotsııany kórý úshin keledi. Tipti olar ómirinde sezinip kórmegen emotsııany bastan keshirý úshin keledi der edim. Menińshe, teatr da sol úshin qyzmet etedi»,- dedi Sýsanna Tsırıýk baspasóz máslıhaty barysynda.
Qoıylymnyń basty keıipkeri – nebári segiz aılyǵynda anasynan aıyrylǵan Assol esimdi qyz. Ol óziniń ákesi – teńizshi Longrenmen birge Kaperna aýylynda turǵan. Ákesi qyzmetinen ketkennen keıin kishkentaı qyzy óziniń kún kórisi úshin asqan sheberlikpen túrli shaǵyn jelkender jáne kemelerdiń modelderin jasap, satýmen aınalysa bastaıdy. Bir kúni, segiz jasar Assol qolyna óziniń kishkene kemesin ustap turǵan beıtanys adamdy kórip qalady. Bul – «óleńder, ańyzdar, áńgimeler men ertegiler jınaýshy» qart Egl edi. Ol oıynshyqty Assolge berip, talaı jyldar ótken soń, qyz boı jetkende, oǵan dál osyndaı alqyzyl jelkendi kemede hanzada kelip, alys elge alyp ketetinin aıtady.
