«Astana Operada» Alan Bóribaevtyń jańa kontserti qoıylady
NUR-SULTAN. QazAqparat – 17 qazanda «Astana Opera» sahnasynda «Moler, Volter jáne Bomarshe, nemese Frantsýz komedııasynyń negizin salýshylar» opera-sımfonııalyq kontserti ótedi. Joba avtory – teatrdyń bas dırıjeri Alan Bóribaev, dep habarlaıdy QazAqparat tilshisi.
Mýzykalyq keshte batys eýropalyq klassık-kompozıtorlardyń ataqty dramatýrgterdiń sıýjetterine jazylǵan shyǵarmalary usynylady.
«Menińshe, bul óte qyzyqty joba. «Moler, Volter jáne Bomarshe, nemese Frantsýz komedııasynyń negizin salýshylar» - mundaı uzaq taqyryp 18-ǵasyrdaǵy romandardyń taqyryby tárizdi. Munda komedııalyq janrlar kóp boldy. Bul rette geografııalyq turǵyda frantsýz teatry oqshaýlandy. Árıne, álemde komedııalyq baǵyttar kóp. Al búgin frantsýz teatrynyń damý paraqtaryna kishigirim saıahat jasaımyz. Bul kezeń 150 jyl ýaqytty qamtydy», - dedi A. Bóribaev teatrda ótken basty daıyndyqta.
Mundaǵy shyǵarmalar úsh jazýshy-dramatýrgpen, komedıograftarmen baılanysty. Sondyqtan spektakl «Moler, Volter jáne Bomarshe, nemese Frantsýz komedııasynyń negizin salýshylar» dep atalady.
«Bir jaǵynan kontsert oılap tapqym keldi. Qazir bizde aıryqsha kúrdeli ýaqyt bolǵandyqtan, kórermenderge kóńildi, boı sergitetin týyndy usynǵym keldi. Bul baǵdarlama arnaıy «Astana Opera» teatry úshin, teatrymyzdyń kórermenderi úshin ázirlengen. Ekinshi jaǵynan ónerdiń kóptegen túrlerin biriktirýge, ámbebap sıntez jasaýǵa tyrystym. Sahnada sımfonııalyq orkestr, klassıkalyq ádebıet, balet, pantomıma, opera ánshileri jáne zamanaýı tehnologııalar bar. Mátindi akter oqıdy. Bul – teatrdyń barlyq kúshi jumyldyrylǵan kontsert. Tipti biregeı ónim jáne shetelde teńdesi joq dep te aıta alamyn», - dedi Alan Bóribaev.
Eske sala ketsek, zalda 50 kórermen ǵana otyra alady, biraq ózge kórermender spektakldi onlaın formatta da tamashalaı alady.
