«Astana Opera» jas tyńdarmanyn shaqyrady
ASTANA. QazAqparat - 15 naýryzda «Astana Opera» teatrynyń kameralyq zalynda teatrdyń jas kórermeni úshin «Túrli mýzykalyq daýystar» atty jańa baǵdarlama usynylyp otyr, dep habarlady «Astana Operanyń» baspasóz qyzmetinen.
- Eger ata-analar bolashaqta balalary vokaldyq klassıkanyń tyńdarmany bolsyn dese, osy bastan daıyndala berse bolady, - deıdi mýzykatanýshy Sáýle Máýletova. - Adam balasynyń daýysy mýzykalyq aspapqa uqsas keledi, alaıda ol skrıpka nemese fortepıanoǵa qaraǵanda anaǵurlym kúrdeli, nege deseńiz, adamnyń daýysy názik, qubylmaly jáne mýzyka zańdarymen qatar, fızıologııalyq zańdarǵa baǵynyshty. Daýysty meńgerý, sahnada óner kórsetý úshin qajymaı eńbek etip, án aıtý sheberligin shyńdaý, ıaǵnı daýysty durys tárbıeleý qajet, - deıdi sózin jalǵastyrǵan mýzykatanýshy. Kontsert júrgizýshileri operalyq daýystardyń - bastan bastap, sopranoǵa deıingi barlyq túrlerin qyzyqty formada aıtyp beredi. Dıdaktıkalyq materıal retinde balalarǵa «Qap, bálem, tura tur!», «Aqshaqar» mýltıplıkatsııalyq fılmderi jáne ataqty ánshilerdiń muraǵattaǵy jazbalary usynylady. «Astana Opera» teatrynyń belgili solıstteri: Artur Qaıypqulov, Saltanat Muratbekova, Narul Toıkenov, Evgenıı Chaınıkov, Qazybek Dosmuhanov, Konstantın Strıgın, Tatıana Vıtsınskaıa, Aızada Qaponova, Ásem Sembına, Elena Ganja kópshilikke tanymal arııalar men dýetterdi shyrqaıdy. Keshte sonymen qatar «Astana Opera» teatrynyń Balalar stýdııasynyń hory (jetekshisi Altynǵanym Ahmetova) óner kórsetedi. «Astana Opera» teatrynyń Balalar stýdııasynyń jas ártisi Aısha Orynbasarova F. Shýberttiń «Ave Maria» shyǵarmasyn jeke shyrqaıdy. Fortepıano partııasyn halyqaralyq konkýrstardyń laýreaty Raýshan Beskempirova men Irına Kýrgýzkına oryndaıdy.
