«Astana Opera» jańa teatr maýsymyn ashady
NUR-SULTAN. QazAqparat - Ulttyq klassıka jaýhary – M.Tólebaevtyń «Birjan-Sara» operasy «Astana Operanyń» jetinshi teatr maýsymynyń shymyldyǵyn túrmek. 5 qyrkúıek kúni teatr esigi kórermender úshin aıqara ashylady, dep habarlaıdy QazAqparat.
Basty partııalarda qazaqstandyq opera sahnasynyń juldyzdary – jetekshi solıster Bıbigúl Januzak, Aızada Qaponova, Dına Hamzına, Beıimbet Tańaryqov, Janat Shybyqbaev óner kórsetpek. Qoıýshy dırıjer – áıgili maestro Abzal Muhıtdınov.
Jetinshi teatr maýsymy elordalyq jurtshylyqty operalyq ári balet spektaklderi, gastroldik óner kórsetýlerimen jáne de, álbette, shyǵarmashylyq ujym ázirlep otyrǵan túrli tosynsyılarmen qýantpaq.
Kópten kútken maýsymnyń ashylýyna sanaýly kúnder qaldy, ártister daıyndyqtarǵa kirisip ketkeli qashan, dekoratsııalar sahnada boı kótergen, tipti zaldyń ózi jazǵy úzilisten keıingi alǵashqy kórermenderin kútýmen múlgip qalǵandaı.
«Birjan-Sara» qazaq opera óneriniń naǵyz ıgiligi bolǵandyqtan, «Astana Opera» teatr maýsymyn alǵash ret ashyp otyrǵan joq. Spektakl óz dramatýrgııasy, qoıylym tobynyń qazirgi kúnimizdegi aıryqsha sheshimderimen elorda turǵyndary men qonaqtarynyń súıispenshiligine bólenip úlgerdi. Kórermenniń qııalyna qanat bitiretin jármeńke kórinisinde erekshe naqysh berilgen: munda daryndy halyq zergerleri, sheber qolónershiler, ákki saýdagerler, atqa qonǵan búrkitshiler men arqan boıymen júretin epti ártister de bar!
3D-tehnologııany paıdalanýdyń arqasynda tabıǵat pen turmys kórinisteri jandana túsedi. Kózdiń jaýyn alar kostıýmder, ıtalıandyq has sheber Serdjıo Metallıdiń beıneproektsııalary, eń bastysy – tamasha mýzyka, solısterdiń keremet daýystary men úılesimdi orkestr úni kórermenge esten ketpes áser qaldyrary anyq.
Qoıýshy rejısser Ashat Maemırov, keńesshi rejısser Mıhaıl Pandjavıdze men qoıýshy dırıjer Abzal Muhıtdınov jekelegen keıipkerlerdiń minez-qulqyn qabyldaýdaǵy qalyptasqan qaǵıdalardy buzyp-jaryp, qazaq operasynyń jańa oqylymyn usynady.
Qoıýshy sýretshiler – Sofıa Tasmaǵambetova, Pavel Dragýnov, bas hormeıster – Qazaqstannyń eńbek sińirgen qaıratkeri E.Dáýitov, qoıýshy horeograf – Mýkaram Avahrı, qoıýshy rejısserdiń assıstenti – Erenbaq Toıkenov.
