«Astana Opera» jańa maýsymǵa daıyndalyp jatyr
NUR-SULTAN. QazAqparat - 18 qyrkúıekte «Astana Operasynyń» jańa maýsymy «Operalyq klassıkaǵa saıahat» týyndysymen ashylady, dep habarlaıdy QazAqparat tilshisi teatrdyń baspasóz qyzmetine silteme jasap.
Gala-opera teatrdyń Úlken zaly sahnasynan onlaın ótedi. Baǵdarlamaǵa ulttyq jáne álemdik muranyń úzdik úlgileri – A.Jubanov, L.Hamıdıdiń «Abaı», Dj.Rossınıdiń «Sevıldik shashtaraz», P.Chaıkovskııdiń «Evgenıı Onegın» operalarynan kórinister engen. Tyńdarman aldynda elordalyq trýppanyń tanymal solısteri óner kórsetpek.
Teatr dırektsııasy 2020 jyldyń ekinshi jartysy men 2021 jyly jurtshylyqty aıtýly premeralar men ǵalamat kontserttik baǵdarlamalar kútetinin aıtty. Qazan aıynyń basynda G.Donıtsettıdiń «Don Paskýale» operasynyń premeralyq onlaın-kórsetilimi ótedi, jańalyqtar tizbegin V.A.Motsarttyń mýzykasyna kórnekti horeograf I.Kılıannyń qoıylymyndaǵy «Alty bı» eksklıýzıvti baleti jalǵastyrmaq. Odan keıin teatrsúıer qaýym nazaryna kópten kútken premeralar: G.Donıtsettıdiń «Mahabbat sýsyny» operasy jáne T.Qajyǵalıev, R.Gaısın men K.Pıno-Kantananyń mýzykasyna Patrık de Bananyń qoıylymyndaǵy «Dala úni» ulttyq baleti usynylmaq.
Tıbor Kochaktyń mýzykasyna Dıýla Harangozonyń «Aqshaqar men jeti ergejeıli» balettik spektakli barshaǵa kishkentaıynan tanys ertegi jelisimen jańa qyzyqty ınterpretatsııada ónersúıer qaýymǵa jol tartady. Asqaq klassıka jankúıerlerine aldymyzdaǵy jyldyń basty premerasy – E.Rahmadıevtiń «Alpamys» ulttyq operasyn usynbaq.
«Bul maýsymdy biz ózimizge tosyn, daǵdylanbaǵan formatta ashqaly otyrmyz: ártister zaldaǵy kórermensiz sahnada óner kórsetetin bolady. Qoıylymdar men kontsertterdiń tikeleı kórsetilimderi qyrkúıek aıyna josparlanyp otyr. Qazirgi sátte solıster osynshalyq uzaq úzilisten keıin jumysqa belsene kirisip ketti. Olar daıyndyq zaldarynda ónerlerin shyńdaýda, alaıda, tyńdarmandarmen alǵashqy kezdesýimiz onlaın-formatta ótetindigine qaramastan, sózsiz, qobaljý ústinde. Teatrdyń kórkemdik keńesi ulttyq jáne álemdik opera men balet klassıkasyn, kameralyq mýzyka kontsertteri jáne, álbette, balalar men jasóspirimder aýdıtorııasy baǵdarlamasyn qamtıtyn segizinshi maýsymnyń mazmundy repertýaryn ázirledi. Kóptegen josparlarymyz koronavırýs pandemııasynyń kesirinen júzege asyrylmaǵan bolatyn. Karantınge qaramastan, biz onlaın rejımde belsendi jumys atqardyq, kóptegen túrli jobalar jasadyq jáne qashan da bizdiń teatrdyń ónerin súıip tamashalaıtyn azamattardan oń pikirler men hattar túrinde jaýaptar alyp otyrdyq», - dedi Qazaqstannyń eńbek sińirgen qaıratkeri, «Astana Opera» teatrynyń dırektory Ǵalym Ahmedıarov.
«Operalyq klassıkaǵa saıahat» gala-operasynan bólek, Kúmis ǵasyr baletteri horeografııalyq óneriniń jaýharlary men N.Rımskıı-Korsakovtyń mýzykasyna «Sheherazada» baleti qyrkúıek aıynyń afıshasyna sán keltirdi.
