Astana Opera jańa Gala-balet baǵdarlamasyn ázirleýde
ASTANA. QazAqparat - «Astana Opera» balettik trýppasy jańa Gala-balet baǵdarlamasyn daıyndaýda. Elordalyq teatrdyń jarqyraǵan ártister quramy, sonymen qatar ýkraındyq jáne belarýsııalyq teatrlardan shaqyrylǵan solıster - Ellına Pohodnyh jáne Konstantın Geronık 25 qańtarda «Astana Opera» teatrynyń Úlken zalynda óner kórsetedi.
Teatrdyń baspasóz qyzmetiniń habarlaýynsha, balettik trýppanyń kórkemdik jetekshisi, Reseıdiń halyq ártisi Altynaı Asylmuratova kórermendi qyzyqty oılarymen qýantpaqshy. Kórermenge M. Petıpa men A. Vaganovanyń eń úzdik horeografııalyq týyndylary usynylady. Zamanaýı qoıylymdardyń áýesqoılary R. Petı, S. Mıkel jáne K. Zverevanyń shyǵarmashylyǵyn tamashalaıdy.
Kesh tusaýkeser men debıýtsiz ótpeıdi. «Astana Opera» teatry baletiniń jetekshi solısi, Qazaqstannyń eńbek sińirgen qaıratkeri Áıgerim Beketaeva men «Astana Opera» teatry baletiniń solısi Oljas Tarlanovtyń oryndaýynda J. Perro, J. Korallı horeografııasyndaǵy A. Adannyń «Jızel» baletinen pa-de-deni alǵash ret tamashalaýǵa bolady. Tańdap alynǵan partııalar ártisterdiń ádettegi keıpinen erekshelenedi, alaıda jańa beınelerdi izdestirý shyǵarmashylyq damýǵa múmkindik beredi.
Elordalyq qaýymǵa óziniń kórnekti jumystarymen tanys reseılik baletmeıster Ksenııa Zvereva, Gala-balet baǵdarlamasy úshin arnaıy zamanaýı horegrafııalyq nómir daıyndady. Ony Anastasııa Zaklınskaıa men Jánibek Ahmedıev usynady.
- Bul - eki jastyń qarym-qatynasy týraly dýet. Abstraktsııa formasy jıi qoldanylatyn qazirgi zamanǵy horeografııa, birin-biri ańǵarmaıtyn qyz ben jigit ómir súretin keńistikti pash etedi. Bir mezette olardyń kózderi túıisedi de, sol sátten bastap olardyń arasynda qarym-qatynas órbıdi. Onyń nemen aıaqtalatyny qupııa, - dep áńgimeledi Altynaı Asylmuratova.
Gala-kontsert baǵdarlamasyna Astanada ótken III Halyqaralyq balet ártisteri baıqaýynyń (2016) laýreattary: Konstantın Geronık (Belarýs Respýblıkasynyń Ulttyq akademııalyq Úlken opera jáne balet teatrynyń jetekshi sahna sheberi) jáne Ellına Pohodnyh (Odessa Ulttyq akademııalyq opera jáne balet ártisi) qatysady. Sondaı-aq solıster arnaıy júldelerdiń ıegerleri atanǵanyn - «Astana Opera» teatrynyń sahnasynda ótetin Gala kontsertte óner kórsetýge quqyq beretin sertıfıkattarǵa ıe bolǵanyn esterińizge sala keteıik. Konstantın Geronık «Jalǵyzdyq» nómerin oryndaıdy.
- Atalǵan horeografııalyq mınıatıýrada Amon Tobınniń keremet mýzykasy paıdalanylǵan, qoıylym Sergeı Mıkeldiki. Bul jalǵyz qalǵan adamnyń jaǵdaıdy ózgertýge amal jasap, odan shyǵýdyń jolyn izdeıtinin jetkizedi. Osy nómerdi men Belarýs Úlken teatrynda jáne balet ártisteriniń halyqaralyq baıqaýlarynda birneshe ret oryndadym, - dep áńgimeledi Konstantın Geronık.
Kontsertke Qazaqstannyń Eńbek sińirgen qaıratkerleri - Mádına Baspaeva, Rústem Seıitbekov, Jandos Áýbákirov, Gaýhar Ýsına, Taıyr Ǵataýov, Áıgerim Beketaeva, jetekshi solıstter - Ánel Rústemova, Baqtııar Adamjan, solıstter - Oljas Tarlanov, Anastasııa Zaklınskaıa jáne basqa talantty bıshiler qatysady.
Ekinshi bólimde Qazaqstannyń eńbek sińirgen qaıratkeri Jandos Áýbákirovtiń Odessanyń opera jáne balet teatrynan shaqyrylǵan solısti Ellına Pohodnyhpen, sonymen qatar «Astana Opera» baletiniń solısteri men ártisteriniń oryndaýynda L. Mınkýstyń, E. Deldevezdiń «Pahıta» baletinen Gran-pa usynylady.
- «Astana Opera» sahnasyndaǵy gala-kontsertke qatysý men úshin úlken qurmet. «Pahıta» baletindegi Gran-pa, klassıkalyq balettiń murasy bolyp tabylatyn eń ǵajap úlgilerdiń biri. Otandyq sahnada men ony birneshe ret oryndadym, biraq ókinishke oraı sońǵy kezde Odessanyń opera jáne balet teatrynyń repertýarynda bul spektakl óte sırek kezdesedi. Men Qazaqstannyń Eńbek sińirgen qaıratkeri Jandos Áýbákirovpen birge dýet oryndaý múmkindigi týǵanyna jáne «Astana Opera» balettik trýppasynyń ujymymen birge jumys jasaıtynyma da qýanyshtymyn. Qazaqstandyq kórermenmen kezdesýdi asyǵa kútemin, - dep aıaqtady sózin Ellına Pohodnyh.
