«Astana Opera» XIV teatr maýsymyn áıgili «Abaı» operasymen ashty
ASTANA. KAZINFORM — «Astana Opera» XIV teatr maýsymyn Ahmet Jubanov pen Latıf Hamıdıdiń Muhtar Áýezov lıbrettosyna jazylǵan «Abaı» operasymen ashty. Qoıylym qos kórnekti kompozıtordyń týǵanyna 120 jyl tolýyna oraı sahnalandy.
Spektakl bastalar aldynda teatr foıesinde taqyryptyq ınstallıatsııalar qoıyldy. Ártister sahnada opera avtorlarynyń shyǵarmashylyq úndestigin áserli kórinispen jetkizdi. «Aıttym sálem, Qalamqas» áni shyrqalǵanda, horǵa kórermen de qosyldy. Odan keıin teatr trýppasy kópshilikti zalǵa shaqyrdy.
«Abaı» operasy – otandyq opera ónerindegi jaýhar týyndylardyń biri. Qoıylymdy qazaq jáne ıtalıan ónerpazdary birlesip daıyndaǵan. Shyǵarmashylyq top quramynda belgili rejısser, Qazaqstannyń halyq ártisi Esmuhan Obaev, bas hormeıster, Qazaqstannyń eńbek sińirgen qaıratkeri Erjan Dáýitov, rejısser Djankarlo del Monako, stsenograf Etsıo Frıdjerıo jáne kostıým sýretshisi Franka Skýarchapıno bar.
Maýsymnyń ashylýynda orkestrge Qazaqstannyń eńbek sińirgen qaıratkeri, Qazaqstan Respýblıkasy Memlekettik syılyǵynyń laýreaty Alan Bóribaev dırıjerlik etti.
Kesh sońynda Memleket basshysy Qasym-Jomart Toqaevtyń atynan «Astana Opera» ujymyna gúl shoqtary tabystaldy.
XIV maýsymda teatr kórermenge birneshe premera usynady. Olardyń qatarynda «Charlı ı Iren», «Tomırıs» baletteri jáne balalarǵa arnalǵan «Arman» mýzykalyq spektakli bar.
Jańa maýsymda teatrdyń gastrol aıasyndaǵy baǵdarlamasy da jalǵasady. «Astana Opera» sahnasynda Memlekettik ult teatry «Vanıa aǵaı» jáne «Tartıýf» spektaklderin qoıady. Al balet trýppasy «Jızel» jáne «Şelkýnchık» qoıylymdarymen Italııaǵa gastrolge attanady. Sonymen qatar teatr ujymy Qazaqstannyń birqatar qalasynda óner kórsetedi.
«Abaı» operasy 5 qyrkúıekte qaıta sahnalanady.124ızmeneno 23:05
