Astana Opera «Týrandot» ertegisiniń jelisi boıynsha birqatar debıýtterdi usynady
ASTANA. QazAqparat - Naýryzdyń 16 jáne 17 kúnderi «Astana Opera» Úlken zaly sahnasynda Dj. Pýchchınıdiń «Týrandot» operasy sahnalanady, dep habarlaıdy QazAqparat teatrdyń baspasóz qyzmpetine silteme jasap.
Qytaı hanshaıymynyń basty partııasyn teatrdyń jetekshi solısi, Qazaqstannyń eńbek sińirgen qaıratkeri Jupar Ǵabdýllına oryndaıdy. Erjúrek ári batyr hanzada Kalaftyń beınesinde alǵash ret elorda sahnasyna osy kúnderi Grýzııadan kelgen tanymal tenor Georgıı Onıanı shyǵady.
Eske salaıyq, Georgıı Onıanı «Astana Opera» sahnasynda budan buryn da óner kórsetken, ol Dj.Pýchchınıdiń taǵy bir jaýhar týyndysy - «Toska» operasynda Marıo Kavaradossıdiń rólin somdaǵan. Bul joly ol álemdik opera repertýaryndaǵy tenorǵa arnalǵan eń áıgili partııalardyń biri - Kalaftyń beınesin somdaıdy, bul partııa oryndaýshylardyń keremet vokaldyq tehnıkasyn pash etip qana qoımaı, sondaı-aq keıipker minezin ashýdaǵy úzdik ártistik sheberlikti tanytýǵa múmkindik beredi. Úshinshi aktidegi belgili arııa áıgili kontserttik nómirlerdiń birine aınalyp, halyqaralyq opera teatrlarynyń sahnasynda turaqty túrde shyrqalýda.
Osy kúnderi kúń Lýı partııasynda teatrdyń solısteri debıýt jasaıdy: osy róldi 16 naýryzda Qazaqstannyń eńbek sińirgen qaıratkeri Bıbigúl Januzaq oryndasa, 17 naýryz kúni elorda turǵyndary men qala qonaqtarynyń aldyna Mádına Islamova shyǵady. Ártister qorǵansyz názik ári Kalafqa degen jaýapsyz mahabbaty úshin ómirimen qosh aıtysýǵa batyl qadam jasaǵan qyzdyń qaıǵyly beınesin asha túsýi kerek. Onyń qaısarlyǵy men batyrlyǵynyń arqasynda tákappar ári salqynqandy Týrandot mahabbattyń ne ekenin biledi. Vokalıster aldynda kúrdeli tapsyrma qoıylǵan - qıyn úsh arııany minsiz oryndaýmen qatar, akterlik oıyn arqyly jan tolǵanysyn kórsetý qajet.
Qytaı ımperatory Altoýmnyń rólinde 16 naýryz kúni «Astana Opera» solısi Ramzat Balakıshıev debıýt jasasa, 17 naýryzda taǵynan aıyrylǵan tatar hany Tımýrdyń partııasynda alǵash ret teatrdyń jetekshi solısi Talǵat Ǵaleev óner kórsetedi. Tımýrdyń beınesin 16 naýryzda Bolat Esimhanov somdaıdy, 17 naýryzda Altoým partııasynda sahnaǵa Aqylbek Tabynbaev shyǵady. 16 jáne 17 naýryz kúnderi Pıng rólin Erjan Saıpov, Pang - Erulan Kámel, Pong - Beıimbet Tańaryqov, Ramzat Balakıshıev, Mandarın - Shyńǵys Rasylhan oryndaıdy.
Spektakl teatrdyń shaqyrylǵan dırıjeri - Dj.Pýchchını shyǵarmashylyǵynyń úzdik mamandarynyń biri Djýzeppe Akýavıvanyń (Italııa) jetekshiligimen ótedi.
«Astana Opera» sımfonııalyq orkestri men hory, qoıylymnyń mýzykalyq jetekshisi - teatrdyń bas dırıjeri, Qazaqstannyń eńbek sińirgen qaıratkeri, QR Memlekettik syılyǵynyń laýreaty aıtýly maestro Alan Bóribaev, bas hormeıster - Qazaqstannyń eńbek sińirgen qaıratkeri Erjan Dáýitov. Qoıýshy rejısser - Davıde Lıvermor (Italııa), qoıýshy sýretshiler - Sofıa Tasmaǵambetova, Pavel Dragýnov. Jaryq boıynsha sýretshi - Vınchentso Raponı (Italııa), proektsııalar boıynsha sýretshi - Karlo Kamoralı («D-wok» kompanııasy). Qoıýshy rejısserdiń assıstentteri - Natalıa Kagadıı, Erenbaq Toıkenov. Balalar horynyń jetekshisi - Altynǵanym Ahmetova.
