«Astana Opera» teatrynyń jańa maýsymy mýzyka festıvalimen bastalady
ASTANA. QazAqparat - Bul - «Astana Opera» teatrynyń kezekti IV kúzgi maýsymy III Halyqaralyq «Jibek joly» mýzyka festıvalimen bastalady, dep habarlaıdy teatrdyń baspasóz qyzmeti.
«Az ǵana ýaqyttan keıin teatrdyń Úlken zal sahnasy ashylady: 22 qyrkúıekte III Halyqaralyq «Jibek joly» mýzyka festıvali bastalyp, 15 qarashaǵa deıin jalǵasady. Gastrolshiler jolǵa jınalýda, al bizge Avstrııa, Italııa, Japonııa, Koreıa, Reseı, Belarýs, Ýkraına jáne taǵy basqa elderden áıgili qonaqtar keledi», delingen habarlamada.
Festıvaldiń mazmundy baǵdarlamasynda birinshi qoıylym retinde Qazaqstandaǵy mýzyka óneriniń jaýhary - «Abaı» operasy turǵandyǵy belgili. «Batterflıaı hanym», «Bogema» operalary men «Baqshasaraı burqaǵy» baletinde Belarýs ártisteri óner kórsetedi. Olardyń ýkraınalyq kórshiles-áriptesteri «Travıata» spektakline daıyndalýda. Italııadan keletin maestro Djýzeppe Akýavıva Úlken zal sahnasynda ótetin ıtalıandyq operalardyń birine dırıjerlyq etedi.
Japonııalyq sheber pıanıst Mııýdjı Kaneko jáne Boltsanodaǵy Býzonı atyndaǵy halyqaralyq pıanınoshylar konkýrsynyń Altyn medal ıegeri (baıqaýdyń tarıhynda mundaı marapat alǵash ret jáne bir ret qana 1969 j. berilgen) Ońtústik Koreıadan kelgen Pek Kon Ý ózderiniń sheberlikterin kórsetpek.
Borıs Eıfman balet teatrynyń trýppasy keledi dep kútilýde. Ártister P. I. Chaıkovskıı men A. Sıtkovetskııdiń mýzykasyna jazylǵan «Onegın» balettik spektaklin usynady.
Festıval baǵdarlamasynda tusaýkeserler de bar: Búkilálemdik rýhanı mádenıet forýmynyń aıasynda Karl Orftyń eń tanymal shyǵarmasy «Karmına Býrana» oryndalady. Spektakldermen birge birqatar gala-baletter men gala-kontsertter de qoıylyp, «Astana Opera» teatrynyń dırıjerlary, ánshileri, hor jáne sımfonııalyq orkestri, sonymen qatar, Italııadan kelgen ártister óner kórsetedi. Aty ańyzǵa aınalǵan ánshi, KSRO-nyń halyq ártisi Ermek Serkebaevtyń 90-jyldyǵyna arnalǵan «Tóbemdegi kók aspan» kontserti erekshe mańyzǵa ıe.
Sonymen qatar, «Jibek joly» festıvali kúnderi teatr qonaqtardy Kameralyq zal sahnasynda da qabyldaıdy, munda Italııa, Avstrııa jáne Reseı aspapshylarynyń qatysýymen kontsertter ótedi. Astanalyq tyńdarmandardy belgili avstrııalyq pıanıst Shtefan Matıas Lademanmen kezdesý múmkindigi kútip tur.
Tanymal mýzykant, «Máskeý sheberleri» kameralyq orkestriniń ánshisi, ári birinshi skrıpkasy, Reseıdiń eńbek sińirgen ártisi Alekseı Lýndın jáne Mılandaǵy ataqty La Skala opera teatrynyń, Týrın Koroldik teatry jáne Rım operasynyń birinshi goboıy bolǵan ıtalıan goboısi - Djanfranko Bortolato óz oryndaýlaryndaǵy qyzyqty mýzykalyq jobalardy daıyndaý ústinde.
III Halyqaralyq «Jibek joly» mýzyka festıvali aıasynda barlyǵy 22 qoıylym kórermender nazaryna usynylady. Bir-birimen jaqyn tanysyp, tájirıbe almasýǵa, ózderiniń sheberlikterin kórsetýge múmkindik beretindikten ártister festıval ýaqytyn asyǵa kútýde. Barlyq qatysýshylar shyǵarmashylyq shattyqqa kenelip, kórermender - joǵary ónerden jarqyn áser alatyny sózsiz.
