Astana Opera teatrynyń ujymyna jańa dırektor tanystyryldy
Mınıstr Tóleýbek Álpıevke «Astana Opera» teatrynyń dırektory qyzmetindegi qajyrly da úzdiksiz eńbegine alǵys bildirdi. Tóleýbek Nyǵmetulynyń mádenıet salasyna sińirgen shyǵarmashylyq eńbegin atap ótken Arystanbek Muhamedıuly teatr ujymyna T. Álpıev budan bylaı «Astana Opera» teatry dırektorynyń birinshi orynbasary qyzmetin atqaratynyn habarlady.
- Birde-bir respýblıkalyq nemese halyqaralyq deńgeıdegi mádenı sharalar Tóleýbek Nyǵmetulynyń qatysýynsyz ótpeıdi, óıtkeni onyń tájirıbesi zor, sondaı-aq, kóp máselelerde erýdıtsııasy tereń adam. Onyń «Astana Opera» teatryna basshylyq etken tusynda álemdik deńgeıdegi keremet spektaklderdiń qoıylymy boldy. Ásirese A. Jubanov pen L. Hamıdıdiń «Abaı» operasynyń qoıylymyn erekshe atap ótkim keledi, - dedi Arystanbek Muhamedıuly.
Mınıstr teatrdyń eńbek ujymyna Memleket basshysy Nursultan Nazarbaevtyń 2016 jylǵy 28 qyrkúıektegi qaýlysyn oqyp berip, soǵan sáıkes jańa dırektor bolyp taǵaıyndalǵan Ahmedıarov Ǵalym Alǵıulyn tanystyrdy.
- Men Prezıdentimiz Nursultan Nazarbaevqa maǵan senim artyp, osy laýazymǵa taǵaıyndaǵanyna alǵysymdy aıtqym keledi, - dep atap ótti Ǵalym Ahmedıarov.
Jańa basshyny teatr ujymy jyly qarsy aldy.
- Biz kóptegen jyldar boıy birge jumys istep kelemiz. Teatr repertýaryn tolyqtyrýdy jalǵastyryp, jańa opera jáne balet spektaklderin qoıamyz. Vıtse-mınıstrdiń laýazymynda basqarýshy retinde jınaǵan barlyq tájirıbemdi men teatrda qoldanýǵa daıynmyn, - deıdi Ǵalym Ahmedıarov.
Esterińizge sala keteıik, Qazaqstannyń eńbek sińirgen qaıratkeri Tóleýbek Álpıev 2014 jylǵy 13 qarashada «Astana Opera» MOBT dırektory laýazymyna taǵaıyndaldy. «Astana Opera» teatrynyń alǵashqy dırektory Qazaqstannyń eńbek sińirgen qaıratkeri Tólegen Muhamedjanov boldy, ol bul qyzmetti 2012 jylǵy 31 qazannan 2014 jylǵy 13 qarashaǵa deıin atqardy.
Ǵ.A.Ahmedıarov Qurmanǵazy atyndaǵy Almaty memlekettik konservatorııasyn támamdaǵan. Ár jyldarda konservatorııa oqytýshysy, QR Respýblıkalyq gvardııasynyń Prezıdenttik orkestriniń halyq aspaptar ansambliniń basshysy, Qazaqstan Respýblıkasy mádenıet jáne aqparat Mınıstrliginiń «Qazaq Áýenderi» AQ prezıdenti bolyp eńbek etti. 2014 jylǵy 3 qarashadan bastap QR Mádenıet jáne sport vıtse-mınıstri qyzmetin atqardy. «Qazaqstannyń eńbek sińirgen qaıratkeri» qurmetti ataǵynyń ıegeri (2010).
