«Astana Opera» teatrynyń trýppasy 90 paıyzǵa jınaqtaldy
ASTANA. 26 qyrkúıek. QazAqparat - «Astana Operada» 4-18 qyrkúıek aralyǵynda hor, sımfonııalyq orkestr ártisteri, opera jáne kordebalet solısteri arasynda konkýrs ótkizildi.
Eske sala ketsek, bul sharanyń birinshi kezeńi aǵymdaǵy jyldyń 3 mamyrynda uıymdastyrylǵan edi. Ol kezde teatr trýppasy tolyq qalyptasqan joq bolatyn, al búginde shyǵarmashylyq ujym 76 adammen tolyqty.
Bilikti ádilqazylar eleginen Qazaqstan, Ózbekstan, Qyrǵyzstan, Reseı, Ýkraına eliniń ókilderi ótti. Baqtaryn synaǵan úmitkerlerdiń jalpy sany 189 adamdy qurady.
Konkýrs komıssııasynyń quramyna otandyq mamandarmen qatar Italııa, Germanııa, Avstrııa, Reseı elderinen bedeldi ádilqazylar shaqyrtyldy. Mılandaǵy La Scala teatrynyń akademııasy men Scuola Civica-da vokaldyq tehnıkadan dáris beretin Vınchentso Mannonyń aıtýynsha, «konkýrstyq irikteýden ótken kandıdattar Eýropa ustazdarynyń dáris kýrsynan ótýleri kerek. Olardyń sheberlik-synyptarynan jas ánshiler dybysty durys shyǵarý men durys túsiný negiz bolatyn án aıtýdyń eski ádisin meńgeredi. Qatysýshylardyń barlyǵy qazaq jáne orys tilindegi arııalardy jaqsy oryndady, alaıda ıtalıandyq operaǵa kelgende, áralýan bolyp keletin batys mádenıetin túsinýde problema týyndady».
«Búgingi tańda «Astana Opera» teatrynyń shyǵarmashylyq ujymy 90% jınaqtaldy. Buǵan opera sııaqty kúrdeli janrda tájirıbeli kásipqoılardan quralǵan bedeldi ádilqazylardyń septigi tıdi. Úmitkerler ishinen úzdik ártister irikteldi», - deıdi «Astana Opera» teatrynyń mýzykalyq jetekshisi Abzal Muhıtdınov.
Іrikteýden ótken konkýrsanttar ózderiniń sheberligin únemi shyńdap otyrýlary kerek, sebebi «Astana Operaǵa» olar kelisim negizinde qabyldandy jáne óz biliktiligin jyl saıyn rastaýlary tıis.
