«Astana Opera» teatrynyń syrtqy qasbetinde mýltımedıalyq 4D shoýy ótedi
ASTANA. QazAqparat - 5-6 shilde kúnderi saǵat 22.30-da «Astana Opera» memlekettik opera jáne balet teatrynyń syrtqy qasbetinde mýltımedıalyq 4D shoýy ótedi. Bul elorda turǵyndaryna merekelik tartý bolmaq. Ártisterdiń jandy daýystaǵy óneri qysqasha beınebaıan arqyly 3D elementterimen súıemeldenedi.
4D shoý birneshe bólimderge bólinedi. Alǵashqy oqıǵa negizine jalyndy jigit pen aıdaı sulý arýdyń mahabbaty týraly qazaqtyń ertegi-ańyzy alynǵan.
Ejelden halqymyzdyń Aıdyń ózine tartatyn ári tazartatyn tylsym qasıeti bar dep sengeni barshamyzǵa málim. Kóneden jibi úzilmegen nanym halyq arasynda túrli zergerlik buıymdardyń paıda bolýyna yqpal etti. Olar tek sándik sıpatta ǵana emes, sıqyrly qupııa kúshke ıe dep esepteldi. Aıtalyq, bala dúnıege kelgen kezde til-kózden saqtap júrsin dep tumar taǵady, keıin de eseıý jyldaryna qatysty alýan qasıetterge ıe baǵaly tastarmen kómkerilgen syrǵa, beldik, er-turman jáne mýzykalyq aspaptar tartý etilgen. Munyń bári osy bólimde kórinis tapqan.
Al «Maqsatqa jetý joly» dep atalatyn bólimi 16-shy jylyna aıaq basqan jas Astananyń tarıhyn baıandaıdy. Osynaý qysqa merzimde qalanyń qol jetkizgen tabystary, halqynyń ónip-ósýi, órkendeýi, qurylys, bilim, sport, ekologııa salalaryndaǵy qol jetkizgen jetistikteri, halyqaralyq deńgeıdegi mán-mańyzy - munyń bári atalmysh qoıylymǵa ózek bolady. El táýelsizdigi jyldary elordanyń barlyq baǵytta jan-jaqty damyǵanyn kórsetetin dıagramma, keste túrinde statıstıkalyq kórsetkishi tańbalandy.
Bul shoý el tarıhyndaǵy aıtýly datalardy aıshyqtaı túsip, ár kórermenge erekshe áser qaldyrmaq. Mundaı tásil Qazaqstanda alǵash ret paıdalanylady, dep habarlaıdy Astana qalasynyń 16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtabynan.
