«Astana Opera» teatrynyń solısteri ıtalıandyq maestro Marko Boemıdiń sheberlik sabaǵynan ótti
ASTANA. QazAqparat - Óner ıeleriniń vokaldyq múmkindikterin shyńdaý maqsatymen «Astana Operaǵa» dırıjer, pıanınoshy, kórnekti maestro Marko Boemı shaqyrtyldy. Bul týraly teatrdyń baspasóz qyzmetinen habarlandy.
Ol «Astana Operaǵa» alǵash ret ótken jyldyń qazanynda álemdik tusaýkeser barysynda kelip, solısterdi «Attıla» operasyna daıyndaǵan edi. Ol kezde Marko Boemı operalyq trýppanyń sanaýly oryndaýshysymen jumys júrgizgen. «Bul joly jumys anaǵurlym qarqyndy boldy, onyń ústine hor ártisteri men solısteriniń tehnıkalyq deńgeıi qyzyǵarlyq. Olardyń basym bóliginiń daýysy tamasha, alaıda olarǵa ne týraly aıtyp turǵany jaıly naqty bilim jetispeıdi, bul oryndaý naqyshy men aıtylý mánerine qatysty»,-delingen teatr málimetinde.
Marko Boemı eń tanymal opera juldyzdary: Lýchano Pavarottı, Chıarellı, Eldar Ábdirazaqov, Býrchýladze, Býrdıno, Elena Obraztsova jáne basqalarymen jumys júrgizgen. Ol «Attıla» qoıylymyna daıyndyq barysynda «Astana Opera» komandasynyń adam aıtqysyz is tyndyrǵanyn jáne sol kezde ózi erekshe raqatqa bólengenin esine alýda. «90% jas oryndaýshylardan turatyn orkestrdiń jumysqa asqan qulshynys, qushtarlyq tanytýy tań qaldyratyn tamasha úılesim. Keıbir kúnderi biz olarmen 10 saǵat boıy jumys júrgizdik, Italııada bulaı bolýy múmkin emes. Al mundaǵy oryndaýshylar ýaqyttyń ótkenine alańdamaı, baqytty boldy... Bul teatrdyń jáne onyń ujymynyń bolashaqta órge júzýge múmkindigi keremet ekenin túsindim», - deıdi Marko Boemı.
Qarqyndy sheberlik sabaǵynan keıin Marko Boemı operanyń jetekshi solısteri: Jupar Ǵabdýllına, Álfııa Kárimova, Dına Hamzınanyń darynyna, sondaı-aq jetekshi solıster Medet Shotabaev pen Talǵat Musabaevqa joǵary baǵa berdi.
