«Astana Opera» teatrynyń solısi Baqtııar Adamjan Túrkııada bas júldeni jeńip aldy
ASTANA. QazAqparat - Qazaqstan baletinde janyp kele jatqan jaryq juldyz, «Astana Opera» teatrynyń jetekshi solısi Baqtııar Adamjan Ystanbulda (Túrkııa) ótken Balet ártisteriniń V halyqaralyq konkýrsynda bas júldeni qanjyǵasyna baılady.
2016 jyldyń 8 shildesinde Sıýreı operalyq teatrynda (Qadykeı aýdany, Ystanbul q., Túrkııa) konkýrsqa qatysý maqsatynda Qazaqstan, Reseı, Avstralııa, Brazılııa, Bolgarııa, Japonııa, Kanada, Ońtústik Afrıka, Ońtústik Koreıa jáne kótpegen basqa elderden kelgen balet ártisteri jınaldy. 3 kezeń boıynsha ótken konkýrs 13 shildege deıin jalǵasty. Qatysýshylar jasy 15 pen 26 aralyǵynda shekteldi. 13 shildede saltanatty Gala-kontsert ótip, Baqtııar Adamjan men ózge fınalǵa shyqqandar konkýrs repertýarynan nomerler usyndy.
Berlınniń Memlekettik baletiniń kórkemdik jetekshisi, «Tokıo-balettiń» shyǵarmashylyq jónindegi keńesshisi Vladımır Malahov tóraǵalyq etken bedeldi ádil qazylar quramynda engender: R. Nýreev at. balet ártisteriniń halyqaralyq konkýrsynyń dırektory R. Bokor, Skope (Makedonııa) Bı teatry jáne bı festıvaliniń dırektory R. Rısımkın, «Dance for You» jýrnalynyń redaktory M. Vıerý, Qazaqstannyń Halyq ártisi G. Tutqybaeva, Boston baletiniń kórkemdik jetekshisi M. Nıssınen, Gollandııalyq bı festıvaliniń kórkemdik jetekshisi, Rotterdamdaǵy Óner ýnıversıtetiniń «Kodarts» bı akademııasynyń atqarý keńesiniń múshesi S. Vıýrsten jáne basqalary.
Baqtııar Adamjannyń bılegenin alǵash kórgen belgili beıjińdik horeograf Isıan Chjan ártistiń bolashaǵy zor jáne fızıkalyq kúıi tamasha ekenin atap ótti.
- Nomerdi qoımas buryn, Baqtııardyń stıli men tehnıkasyn anyqtaý úshin, aldymen bılep berýin ótindim. Solıst tamasha formada, bárin jyldam, lezde qaǵyp alady, áli kóp nárseni úırenýi múmkin. Birigip jumys istegen ekinshi kúnnen-aq ózgeristi baıqadym - osy qysqa ýaqyt ishinde ártis ózi úshin jańa stıldi meńgerip, aıtarlyqtaı ósti. Men onyń sheberligi men alǵan bilimin pash etýge tyrystym, - deıdi Isıan Chjan.
Óz kezeginde Baqtııar Adamjan daıyndyqtyń alǵashqy sátinen-aq jeńiske qol jetkizýge bel býǵan edi.
- Ystanbuldaǵy konkýrsqa álemniń túrli elderinen úzdik bıshiler keldi, sol sebepti molynan tájirıbe almastyq. Túrik kórermeni meniń ónerimdi ystyq yqylaspen qarsy aldy. Zamanaýı horeografııadan keıin klassıkalyq bıge «aýysý» ońaı bolǵan joq. Jaqynda dúnıege kelgen ulymdy oılaǵanym sátti óner kórsetýime kómegin tıgizdi. Jeńis qanattandyrdy, endi meniń burynǵydan da kóp jumys istep, ósip, aldaǵy maqsattaryma qol jetkizgim keledi, - dedi oıymen bólisken Baqtııar Adamjan.
