«Astana Opera» teatrynyń quramy álemge tanymal opera ánshisimen tolyqty

Teatr trýppasynyń ártisteri shart boıynsha bir jylǵa jumysqa alynady jáne osy merzim aıaqtalǵanda, óner ıeleri óz kásibı deńgeılerin qaıta rastap, attestattaýdan ótýleri kerek. Álemdik teatrlardyń tájirıbesinen úlgi bolǵan bul júıe ártisterdi únemi shyǵarmashylyq izdenýshilikterge talaptandyryp, yntalandyrady. Atalǵan konkýrstyń qazylar alqasynyń quramyna otandyq mamandarmen qatar Almanııa, Grekııa, Italııa, Reseı jáne Ýkraına sııaqty elderden bedeldi adamdar shaqyrtyldy. Dodada tek Qazaqstan ártisteri ǵana emes, alys-jaqyn sheteldikter de óz baqtaryn synady. Konkýrsqa qatysqan 468 adamnyń 332-si synnan súrinbeı ótti. Sondaı-aq teatrdyń operalyq trýppasynda da eleýli oqıǵa boldy. Onyń quramy ásem bas daýsynyń ıesi, Armenııa Respýblıkasynyń Halyq ártisi, álemdik deńgeıde tanymal opera ánshi Barseg Týmanıanmen tolyqty. Jalpy alǵanda, opera solısteriniń quramy burynǵy qalpyn saqtap, negizgileri qaldy. Al keı ártister sahnanyń jetekshi sheberleri deńgeıine deıin kóterildi. Bul konkýrsqa 49 adam qatysty, joǵary básekelestik ánshi qyz-kelinshekter (soprano) arasynda baıqalyp, 24 úmitkerdiń tek 9-y ǵana ótti. Reseıdiń Eńbek sińirgen ártisi, «Máskeýdiń asqan sheberleri» orkestriniń solısti, Máskeý konservatorııanyń ustazy, halyqaralyq konkýrstardyń laýreaty, Salatsgrıvadaǵy (Latvııa) halyqaralyq klassıkalyq mýzyka festıvaliniń uıymdastyrýshysy Lýndın Alekseı ártisterge óz baǵasyn berdi.

«Óte jaqsy áserde qaldym. Orkestrdiń ortasha degen deńgeıi - óte joǵary, jekelegen mýzykanttar tipti tań qaldyrdy. Al keıbir úrmeli aspaptar tobynyń keremettigi sonshalyq, Máskeýdegige qaraǵanda munda tańdaý jasaıtyn múmkindik mol. Mýzykanttar kásibı deńgeıleriniń joǵary ekenin kórsetti. Saıysqa ótinim bergender arasynda ekinshi kýrsta oqyp júrip, oqýmen qatar tyǵyz jumys kestesine úlgerý kerektigin oılamaı kelgender de boldy», - deıdi Reseıdiń Eńbek sińirgen ártisi. Onyń oıynsha, «Astana Opera» mýzykanttary ózge konkýrsqa qatysýshylardan ózderiniń joǵary sheberlikterimen erekshelenedi. Atap aıtqanda, naqyshyna keltirip oınaý, ekpinniń tazalyǵy, mátindi oqýdaǵy uqyptylyq jaǵynan olar ozyq tur. Munyń barlyǵy joǵary klasty orkestrde tártiptiń qalyptasqandyǵynyń nátıjesi. Saıys sońynda orkestrdiń quramy 20 mýzykantpen tolyqty. Al hor quramy ózgergen joq. Balettik trýppanyń negizgi quramy saqtalyp, kordebaletke 17 men 23 jas aralyǵyndaǵy 12 adam alyndy. Balet ártisteriniń pozıtsııasynda shamaly ózgerister oryn aldy: kordebalettegi birneshe adam solıst atanyp, trýppa jetekshi solıst atanǵan Jandos Áýbákirovpen tolyqty.

«Astana Opera» baletiniń kórkemdik jetekshisi Tursynbek Nurqalıev konkýrstan ótken qatysýshylardyń qarymy kúshti ekenin atap ótti. Komıssııany KSRO Halyq ártisi, asa kórnekti bıshi, Úlken teatrdyń prıma balerınasy Lıýdmıla Semenıak basqardy.