Astana Opera teatrynyń baleti Seýldegi bı baıqaýynda birinshi orynǵa ıe boldy
ASTANA. QazAqparat - Otandyq balet juldyzy, «Astana Opera» teatrynyń jetekshi solısi Baqtııar Adamjan Seýldegi (Koreıa Respýblıkasy) XIII Halyqaralyq bı baıqaýynda jeńiske jetti.
Teatrdyń baspasóz qyzmetiniń habarlaýynsha, ártis «Klassıkalyq bı» sanatynyń erler arasyndaǵy eresekter tobynda vırtýozdyq tehnıkasy jáne joǵary kásibı oryndaýymen tek kórermenderdiń ǵana emes, ádil qazylardyń da nazaryn jaýlap alyp, 1-shi orynǵa ıe boldy.
6 men 10 tamyz aralyǵynda Koreı Ulttyq teatrynda búkil dúnıe júziniń myqty balet ártisteri júldeli oryndar úshin kúresti. 11 jastan 35 jasqa deıingi bıshiler úsh sanatta synasty - klassıkalyq, qazirgi zamanǵy jáne halyq bıi. 11 tamyz marapattaý rásimi ótti, al 12 jáne 13 tamyzda jeńimpazdar qatysýymen saltanatty Gala-kontsert uıymdastyrylady.
Ádilqazylar alqasynyń quramynda «Astana Opera» teatry balet trýppasynyń dırektory, Qazaqstannyń eńbek sińirgen qaıratkeri Tursynbek Nurqalıevte kirdi. Baletmeısterdiń aıtýynsha, búkil álemdik balet elıtasyn baýlyǵan jobaǵa qatysý,- úlken qurmet jáne jaýapkershilik.
«Búgingi kúni bizdiń ártisterimizdiń shyǵarmashylyq áleýeti óte joǵary, ári kúrdeli spektaklder qoıylymdaryn júzege asyrýǵa, aldyńǵy qatarly álemdik alańdarda tabysty óner kórsetýge, aıtýly baıqaýlarda júldeli oryndarǵa ıe bolýǵa múmkindik beredi. Bizdiń tárbıelenýshilerdiń tabystary, olardyń kásibı sheberlikteri men olardyń balet ónerine degen mahabbattary meni tereń tebirentti. Halyqaralyq deńgeıdegi mamandardyń qazaqstandyq ártisterge bergen joǵary baǵalary bizdiń tamasha Otanymyz úshin maqtanyshymyzdy tolyqtyrady», - dedi Tursynbek Nurqalıev.
Esterińizge sala keteıik, Baqtııar Adamjan jaqynda Ystambul (Túrkııa) qalasynan jeńispen oraldy jáne aptalyq demalystan keıin jańadan kúsh jınaǵan ol Seýldegi baıqaýǵa qatysý úshin daıyndyqqa kiristi. Ártistiń baǵdarlamasyna klassıkalyq baletterden varıtsatsııalar endi: L. Mınkýstyń «Baıaderkasy», B. Asafevtyń «Parıj jalyny», Ts. Pýnıdiń «Esmeraldasy», sonymen qatar ol úshin arnaıy belgili qytaılyq horeograf Isıan Chjannyń qoıylymyndaǵy «Oıaný sátinde» (In the wake) atty zamanaýı týyndy jazyldy. Bıshiniń pikirinshe, ónerińniń tabysty shyǵýy úshin, eń bastysy - jaqsy kóńil-kúı, tamasha fızıkalyq nysan jáne pozıtıvti kóńil-kúı qajet.
