«Astana opera» teatrynyń balet ujymy Oman elin tamsandyryp qaıtty
ASTANA. QazAqparat - «Astana Opera» teatrynyń dırektory Ǵalym Ahmedııarov balet ujymynyń Oman eline jasaǵan gastroldik sapary sátti aıaqtalǵanyn málim etti, dep habarlaıdy «QazAqparat» HAA tilshisi.
«Teatr ujymy Oman eliniń astanasy Maskattaǵy Hanshaıym teatrynda óner kórsetti. Ol jaqta «Astana Opera» teatrynyń balet ujymy Chaıkovskııdiń «Aqqý kóli» baletimen debıýt jasady. Bul gastroldik sapardy qazaqstandyq balet óneriniń tyń paraǵy dep aıtýǵa da bolady. Biz tolyqtaı Oman eliniń qarjylandyrýymen gastroldik sapar jasaǵynymyzdy atap ótkimiz keledi. Barlyq shyǵyndy Oman eli ózi kóterdi. Bul degenińiz bizdiń balettiń halyqaralyq deńgeıge kóterilgenin dáleldeıdi», - deıdi dırektor Ǵalym Ahmedııarov.
Oman eline «Astana opera» teatrynyń balet ujymy tuńǵysh ret óner kórsetken. Shyǵystaǵy elde Altynaı Asylmuratovanyń jańa horeografııalyq redaktsııasyndaǵy álemdik klassıka jaýhary Chaıkovskııdiń «Aqqý kóli» baleti omandyqtardyń qoshemetine ıe bolǵan.
«Bizdiń balet óneriniń maıtalmandary kórermendi beı-jaı qaldyrmady. Oman eliniń ózindik erejeleriqalyptasqan memleket ekenin biletin edik. Sondyqtan, azdap qobaljydyq. Alaıda prıma-balerına Mádına Basbaeva men Áıgerim Beketaevanyń ónerine omandyqtar oryndarynan turyp qol soqty. Ónerimizdiń ózge elde baǵalanǵanyna qýanyshtymyz», - deıdi «Astana Opera» teatrynyń balet trýppasynyń kórkemdik jetekshisi Altynaı Asylmuratova.
