«Astana Opera» teatrynyń balet bıshisi Frantsııanyń «Bordo» teatrynda óner kórsetedi
ASTANA. QazAqparat - Zamanymyzdyń kórnekti horeografy Sharl Jıýd «Astana Opera» teatry baletiniń jetekshi solısi Mádına Baspaevany «Bordo» teatrynyń sahnasynda kompozıtor L. Mınkýstyń mýzykasyna jazylǵan «Don Kıhot» baletinde óner kórsetýge shaqyrdy.
Mádına Baspaeva 28 sáýir men 3 mamyr aralyǵynda Kıtrı basty partııasyn frantsýzdyq balet trýppasymen repetıtsııadan ótkizedi. Qoıylymnyń tusaýkeseri aǵymdaǵy jyldyń maýsymynda ótedi, dep josparlanýda. Qazaqtyń ónerli qyzy frantsýz sahnasyna birinshi ret shyǵaıyn dep turǵan joq. Esterińizge sala keteıik, balerına «Bordo» teatrynda «Romeo men Djýletta» qoıylymynyń tusaýkeserinde bılegen. «Mádına «Romeo men Djýlettanyń» tusaýkeserinde bılegende men zalda boldym. Óne boıym shymyrlap, adam aıtqysyz áser aldym. Men qanshama spektakl kórdim, solardyń kóbinde ishim pysyp otyratynmyn, sózime senersiz. Qansha jerden tehnıkasy myqty bolǵanmen, eshqandaı áser almasań, ártis beıneni jetkize almady degen sóz. Tehnıkany tamashalaý úshin men sport saraıyna nemese tsırkke bara alamyn, al Mádına Baspaevanyń oryndaǵanyna qarap shynymen súısinesiń, ol kórermenge ishindegi baryn aqtarady», - deıdi «Bordo» balettik trýppasynyń dırektory Sharl Jıýd. Sol tusaýkeserden keıin qoıýshy horeograf qazaqstandyq bıshige maýsym aıynda «Bordo» teatrynyń sahnasynda bıleýdi usyndy. Balet ártisi birinshi kezekte ózine bı sheberligin úıretken ustazdary T.Á. Nurqalıev men Ǵ.I.Bóribaevaǵa alǵysyn bildirdi. «Frantsýz kórermeni bizdiń balet mektebine, ónerimizge laıyqty baǵasyn beredi dep úmittenemin. «Astana Opera» teatrynyń atynan óner kórsetetinimdi shynymen maqtan tutamyn. Ózime nyq senimdimin, «Bordo» balettik trýppasy maǵan jyly qabaqpen qarap, jaqsy qabyldady. Ózim ómirde ashyq-jarqyn adam bolǵandyqtan, bas keıipkerdiń partııasy janyma jaqyn, al men bıleıtin Kıtrıdiń minezi nazdy, keıde erke», - dep atap ótti Mádına Baspaeva. Sondaı-aq balerına Sharl Jıýdpen jumys jasaý oǵan baǵa jetpes tájirıbe beretinin aıtady. «Horeograf óte baǵaly eskertýler jasaıdy. Eýropalyq balet mektebiniń bizdikinen aıyrmashylyǵy bar, aıtalyq, qoldy ustaý, bıleý máneri - bári basqasha, anaǵurlym erkinirek», - deıdi bıshi.
