«Astana Opera» teatrynyń ánshisi Avstrııa sahnasynda óner kórsetti
ASTANA. QazAqparat - «Astana Opera» teatrynyń jetekshi solısi, Qazaqstannyń eńbek sińirgen qaıratkeri Medet Shotabaev Vınchentso Bellınıdiń «Norma» operasyndaǵy Pollıon partııasymen debıýt jasady. Qazaqstandyq ánshi tanymal Graz Opera (Avstrııa) sahnasynda óner kórsetti, dep habarlaıdy teatrdyń baspasóz qyzmeti.
Spektakldiń tusaýkeseri 6 mamyr kúni ótti, budan keıin bizdiń vokalıst taǵy 11 spektaklde rım prokonsýlynyń partııasyn oryndady, sońǵy óner kórsetýi 23 maýsym kúni ótti.
- Qoıylymdy biz bir aı daıyndadyq, mańyzdy mýzykalyq ári rejısserlik jumys júrip jatty. Bas kezinde, men biraz qobaljydym, bul jańa ári kúrdeli partııa qolymnan kele me dep tolqydym. Bir jaǵynan, belkanto stılin shyńdap jatyrmyn degen zor qýanyshty sezindim, sebebi bul tájirıbe nátıjesin berip, basqa da spektaklderge oń áser eteri sózsiz. Keıin, qoıylym úrdisine shabyttanyp, mýzykalyq aýradan áser alyp, ataqty ánshilermen jumys jasaı otyryp, ózim de ashyla bastadym, akterlik sheberligimdi tanyttym, jaqsy oıyn men tehnıkamdy kórsettim. Áriptesterim meni óte joǵary baǵalady, - dedi M.Shotabaev.
Jalyndy qaýym da qazaqstandyq ánshini qýana qarsy aldy, tyńdarmandar ony sahnadan jibermeı, «bravo» dep aıqaılady. Spektaklderden keıin bizdiń solıstke mýzykalyq synshylar maqala arnap jatty. Nemis tilinde shyǵatyn sondaı gazetterdiń birinde vokalıst ózi týraly kelesi pikirdi oqydy: «Qazaqstandyq jas ánshi óziniń syńǵyrlaǵan keń aýqymdy daýsyn, ıkemdi tehnıkasyn pash etti» - dep jazdy Kronen Zeitung gazeti.
Sózdiń reti kelgende, ánshi otanynyń dańqyn shyǵaryp júrgenin aıta ketken jón: qaı jerde óner kórsetse de, barlyq afıshalarda onyń esimimen qatar «Astana Opera» teatry, Qazaqstan ataýy birge júredi.
- Óte kólemdi jumys atqaryldy - kúnara án shyrqadym. V.Bellınıdiń «Norma» operasy - belkanto stıli úlgisindegi shyńdardyń biri ekenin atap ótken jón. Spektaklder arasynda Bratıslavaǵa baryp qaıttym, ol jerde P.I.Chaıkovskııdiń «Evgenıı Onegın» operasyndaǵy Lenskıı partııasyn oryndadym. Osydan ózimniń mansabymdy bastadym, bul partııany Brazılııada kórsettim. Kórermender men basshylyqqa unaǵany sonshalyq, meni kelesi maýsymda Dj.Verdıdiń «Travıata» operasyndaǵy Alfred partııasyn oryndaýǵa shaqyrdy, - dep josparymen bólisti ánshi.
Úsh aı boıy Medet Shotabaevty otanynda januıasy men qazaqstandyq tabynýshylary kútýmen boldy, al jaqynda, 5 shilde kúni Beıbitshilik jáne Kelisim saraıy janynda QR Mádenıet jáne sport mınıstrligi usynyp otyrǵan E.Brýsılovskııdiń «Qyz Jibek» operasynan súıikti ánshisiniń daýsyn estip, tamsana alady. Bul operada Medet Tólegenniń partııasyn oryndaıdy. Tamyz aıynda ánshi ataqty maestro Plasıdo Domıngomen birge Dj.Verdıdiń «Travıata» spektaklinde óner kórsetýge daıyndalýda.
