«Astana Opera» teatrynyń alǵashqy gastroli qaıda ótetini belgili boldy
ASTANA. QazAqparat - 2014 jyldyń 4-10 aqpan aralyǵynda «Astana Opera» teatrynyń gastroli ótedi. Almatylyq kórermen astanalyq teatrdyń úzdik qoıylymdaryn Abaı atyndaǵy MAOBT sahnasynda jeti kún tamashalaı alady. Bul týraly Mádenıet jáne aqparat mınıstrliginiń resmı saıty habarlady.
Saıttyń málimetinshe, gastroldik baǵdarlamanyń birinshi kúni - 4 aqpanda Reseıdiń halyq ártisi ıÝrıı Aleksandrovtyń qoıylymyndaǵy qazaq operasynyń marjany - «Birjan-Sara» usynylady. Al 5 aqpanda saǵat 12:00-de kórnekti kompozıtor Sergeı Prokofevtiń «Petıa men qasqyr» sımfonııalyq ertegisi jas kórermenge usynylady. Osy kúni keshki 19:00-de «Astana Opera» teatrynyń Sımfonııalyq orkestri kontsert beredi. 6 aqpanda kópshilik nazaryna Gala-kontsert usynylmaqshy. Hor ónerin súıer qaýym QR eńbek sińirgen qaıratkeri Erjan Dáýitov jetekshilik etetin «Astana Opera» kameralyq horynyń kontsertin 7 aqpanda tamashalaı alady. 9 aqpanda kameralyq zalda Kameralyq mýzykadan kontsert ótedi.
«Sonymen qatar, «Astana Opera» teatrynyń balettik trýppasy balet súıer qaýym úshin álemdik horeografııanyń marjandary: frantsýzdyń horeografy Sharl Jıýdtiń qoıylymyndaǵy «Romeo men Djýletta» baletin 8 aqpanda alyp barady. «Astan Opera» teatry gastroliniń afıshasyndaǵy spektaklder tizimin kórermen nazaryna aǵymdaǵy jyldyń 10 aqpanynda usynylatyn, Reseıdiń halyq ártisi Borıs Eıfmannyń qoıylymyndaǵy «Roden» baleti túıindeıdi», delingen habarlamada.
«Astana Opera» teatrynyń dırektory Tólegen Muhamedjanov gastroldik jospardyń bekitilip, endigi atalǵan qoıylymdarǵa teatr trýppasy qyzý daıyndalyp jatqanyn atap ótti. «Biz úshin bul sapar synaqpen teń, sebebi aldynda Qazaqstanmen qatar shetelde ótetin úlken gastrolder turǵan «Astana Opera» teatry úshin bul alǵashqy qadam», - deıdi T. Muhamedjanov.
