«Astana Opera» teatrynda «Júrekten júrekke» atty qaıyrymdylyq kontserti ótedi
ASTANA. QazAqparat - Balalardy qorǵaý kúnine oraı «Astana Opera» kameralyq zalynyń sahnasynda 7 maýsymda «Júrekten júrekke» atty qaıyrymdylyq kontserti ótedi. Kontsertti Astana qalasynyń balalar úıinen keletin tárbıelenýshiler tamashalaıdy, dep habarlady «Astana Opera» teatrynyń baspasóz qyzmeti.
«Balalar stýdııasy osymen ekinshi ret qaıyrymdylyq kontsertin uıymdastyryp otyr. Astanalyq teatrdyń jas ártisteri ónerin, bar kóńilin ózderiniń qurdastaryna arnasa jáne sol jas kórermenniń ystyq yqylasyna bólense dep tileımiz», - deıdi balalar stýdııasynyń jetekshisi Maııa Beknazar.
Kórermenniń ishi pyspaıdy, nege deseńiz kontsert barysynda vokaldyq nomerler balettik nomermen aralas júredi, atap aıtsaq, balalarǵa H. Bıbıdiń «Men mýzykany bilmeıdi dep kim aıtty», M. Іlııasovtyń «Merekem - sen», T. Muhamedjanovtyń «Zaman-aı», F. Grýberdiń «Tym-tyrys tún», D. Týhmanovtyń «Shatyrda kókqutan», P.I. Chaıkovskııdiń «Jańǵaq shaqqysh» baletinen «Qar úlpeginiń valsi» jáne basqa da kóptegen týyndylar usynylady.
«Baǵdarlamaǵa balalar stýdııasynyń ekinshi maýsym barysynda úırengen shyǵarmalary engizildi. Balalar repertýary rejısserlyq-qoıylymdyq turǵydan alǵanda jańa qyrynan usynylatyn qyzyqty ánderden turady. Óziniń boıyndaǵy ónerin, teatrymyzdyń Úlken sahnasynda Dj. Pýchchınıdiń «Toska» operasynyń úshinshi aktisinde jeke daýysta balaqaı baqtashyny oryndap qoıylymǵa qatysqan, jas ártister kórsetedi. Keıbir ártister osy kúni sahnaǵa alǵash ret shyǵady», - dep tolyqtyrdy Maııa Beknazar.
QRnyń eńbek sińirgen ártisi Jannat Baqtaı jáne teatr solısi Talǵat Ǵaleev jas ánshiler - Aısha Orynbasarova, Alısa Shaıpak, Aırıka Nárıman, Ázıza Ahmedjanova, Adılıa Sársenova, Alısha Nurmaǵambetova, Marııa Savostıanova, Laýra Kúlekesheva sııaqty jas ónerpazdardy qoldap, sahnaǵa shyǵady.
Uıymdastyrýshylar Balalardy qorǵaý kúni - oqý jyly aıaqtalyp, kún nury jylýyn tógip, salqyn samal mańdaıdan esip, balalardyń arqany keńge sala ómirdiń shattyǵyn sezinetin jazdyń tamasha merekesi ekenin atap ótti.
