«Astana Opera» teatrynda úzdik óner qoıylymy «Spartak» sahnalady (FOTO)
ASTANA. QazAqparat - Zulymdyq pen erlik týraly baıandaıtyn «Spartak» baletiniń qoıylymy 18 qarashada «Astana Opera» teatry úlken zalynyń sahnasynda ótedi. Basty partııalardy Baqtııar Adamjan jáne QR Eńbek sińirgen qaıratkeri Mádına Baspaeva oryndaıdy, dep habarlaıdy elordalyq teatrdyń baspasóz qyzmetinen.
- Meniń qaharmanym, Spartaktyń adal mahabbaty Frıgııa qoıylymda áıel zatyna tán máńgilik náziktikti beıneleıdi. Onyń tereń shynaıy mahabbaty frakııalyqqa ómir súrýge jáne bostandyq úshin kúresýge kómektesedi. Frıgııa óziniń qaısarlyǵymen jáne aqyldylyǵymen meniń janyma jaqyn,- deıdi jetekshi solıst Mádına Baspaeva. Qoıýshy horeograf - KSRO halyq ártisi, memlekettik syılyqtardyń laýreaty ıÝrıı Grıgorovıch álemge úlken psıhologızmimen jáne qasiretti shıelenisimen erekshelenetin qoıylymdy pash etti. «Astana Opera» teatryndaǵy balettiń tusaýkeseri 2014 jyly 6 maýsymda ótken. 1968 jyldyń ózinde qoıylymǵa arnap alǵashqy úlgilerdi jasaǵan kórnekti teatr sýretshisi Sımon Vırsaladzeniń minsiz jumysy áli kúnge deıin qaıtalanbas dúnıe bolyp sanalady. «Spartak» - mýzyka óneriniń, horeografııa men kórkem sýret óneriniń eń úzdik jıyntyǵynyń úlgisi, zamanymyzdyń eń kórkem jáne eń suranysy joǵary qoıylymy. Oqıǵa jelisi kórermenge zulym Krass (Arman Orazov) basqarǵan ımperator áleminiń áskerı mashınasy beıbit ómirdi qalaı qıratatynyn baıandaıdy. Ol ondaǵan myń adamdy tutqynǵa alady, solardyń ishinde Spartak (Baqtııar Adamjan) pen Frıgııa (Mádına Baspaeva) da bar. Birge bolý úshin qos ǵashyqqa talaı synnan ótýge týra keledi. Sońǵy kóriniste Frıgııanyń ǵashyǵynyń máıitine kelip, ony joqtap jylaýy, onyń erliginiń máńgi ólmeıtinine degen senimi qoıylymdy áserli ete túsedi. Qoıylym saǵat 19:00-de bastalady.
